Aizawl: Noodles hriat hlawh Wai Wai siamtute chuan an thil siam ei nasa Mizoram mipui chungah lawmthu an sawi a. Inkalpawhna kawng a that a, power supply hnianghnar a awm ve leh ngelnghet zawka rawn inbun dan an dap dawn tih an sawi.
Nimin khan Wai Wai siamtu Chaudhary Group hnuaia CG Foods managing director Varun Chaudhary chuan Aizawl Press Club-ah thu thar thehdarhtute kawmin, Mizoram mipuiin an hmelhriat tak leh naupang atanga puitling thlengin an ei nasat Wai Wai hi ram 30 chuangah an thawnchhuak tih a sawi a. Asia ram bakah Africa ram thenkhat leh middle east ram thlengin an thil siam hi an thawnchhuak tih a sawi.
Zawhna chhangin Varun Chaudhary chuan, Wai Wai an hralh tamna state-ah Mizoram pathumna niin, India ramah Mizoram chu a mi cheng zat anga chhutin Wai Wai ei nasa state pakhatna a ni pha tih a sawi a. Heti taka an thil siam an ngaihhlut avang hian Mizoram tan pek let ve tur an la rawn dap dawn a, rel kawng a tlang that a, power supply hnianghnar a awm hunah liantham zawka rawn inbun an duh tih a sawi.