Khelh hniha vawi hnih chak mai piah lama an tumpuite sawp ve vetu, Mizo naupangte chuan khelh khat an la neihah an pount hmuh zat hmu mek, Maharashtra chu an hnehtawk thei a ni chuan goal difference that vanga semifinal an lut dawn.
Amritsar, Punjab-a Junior Boys’ National Football Championship for Dr B.C Roy Trophy 2025-26 (Tier I) khelh mekah Mizoram hian Group D-a an khelh tawh vawi hnihah goal 19 thunin an la chhuah lo va, goal difference 19 an nei.
Anmahni ang bawka vawi hnih chak tawh, Maharashtra-in goal 13 thunin vawi hnih an chhuah a, goal difference 11 an nei a. Semifinal lut inchuhin Zirtawpni tlaiah an insu dawn.
Mizoram hian khawthlang state naupangte hi an hnehtawk thei a nih chuan goal difference that zawk vangin an group-ah a sang ber niin semifinal an lut thei dawn a ni.
Mizo naupangte hian Thawhtanni tuk khan an khelh hmasak bera 10-0-a Chandigarh an sawp hnuah Nilaini tuk khan 9-0-in Chhatisgarh an sawp leh.
GNDU Sports Complex-a inkhelah hian bul tantu insiksawkin Chandigarh an sawp tuma bul tan lo paliin Chhattisgarh lakah bul an tan.
Mizoram tan hian Joel Lalremruata leh Malsawmdawngkima ten goal hnih ve ve an thun a. Vairengte naupang, Joel-ah hian inkhel tan atanga minute 12-ah Mizoram goal hmahruai thunin chawlhlawk hma minute ngaah a goal hnihna a thun belh leh.
Joel-a goal hnih thun inkarah hian Lalawmpuia’n goal khat a thun a. Chawlhlawk hma chiahin Dawngkima’n Mizoram goal lina a thun a. Hun tawp hma lawkin Venghlun, Mamit naupang hian Mizoram goal riatna leh a goal hnihna a thun bawk.
Second half tan atanga minute ngaah Enok Lalchelzing chuan Mizoram goal ngana thunin Victor Vanlalmalsawmdawngzela-ah minute hnih hnu lekah a thun belh leh a. Bench atanga lut, S Lalremsiama’n minute 73-ah goal sarihna thunin minute 90+3-ah Lalrempuia’n goal kuana a thun veleh a ni.
Junior Boys’ National Football Championship for Dr. BC Roy Trophy hi kum 1962 atanga khelh tan niin a tirah chuan kum 19 hnuai lam inelnaa kalpui thin a ni a, 2023-24 atang khan kum 15 hnuai inelna a ni a, Telangana chu champion lai an ni.
Kuminah hian Tier I-ah state/union territory 16 inelin group liah then an ni a. Group tina a sang ber theuhten semifinal an lut ang a, Thawhtanniah semifinal hi khelh tur niin July 30-ah final khelh a ni ang.