Aizawl: Larsap Gen. Vijay Kumar Singh chuan India Meteorological Department (IMD) hnuaia Meteorological Centre, Aizawl Director Sudheer Kumar Dwivedi hnenah khaw chin hrilhlawkna leh data pawimawhte Mizo tawng ngeia tar lan tum turin a chah.
Nimina Raj Bhavan-a an inkawmnaah Larsap General Vijay Kumar Singh chuan Sudheer Kumar Dwivedi chu khaw chin hrilhlawkna leh data pawimawh tak tak siam kawnga an hmalaknate fakawm a tih thu sawiin, hmalaknate tun aia zau zawka tihlara put darh zung zung a nih theih nan line department leh media-te zau zawka thawhpui tur leh Mizo mipuiin tangkai taka an chhawr theih nan Mizo tawng ngeia tarlan tum tur leh, Mizorama radar bun thuai a nih theih nana hma la rang turin a chah.
Meteorological Centre Aizawl hian VVIP lo zin apianga an kalna tur hmuna khaw awm dan tur hrilhlawkna siam bakah ni sarih chhung atan zela Mizorama khaw awm dan tur hrilhlawkna siamte, tourist hip nana Aizawl Air Quality Index siam bakah Mizorama khualzinte kal tamna hmun pali thlan chhuaha khaw awm dan tur hrilhlawkna siamte leh darkar ruk kalta khaw awm dan kimchang, social media leh website kaltlangin a tar lang thin a ni.
Hmachhawp an neih zingah kumin chhung ngeia Mission Mausam hnuaia Doppler Weather Radar, Laipuitlang, Aizawla bunte, Mizorama cyclone tleh thin zinga za zela 90 te chu chhim lam atanga lo thawk a nih avangin, Meteorological Office, Siahaa bunte leh zirlaite tan Aizawl Meteorological Centre-a Training & Awareness Centre dinte a tel a. Heng bakah hian nakin zel atana lo inruahman lawk nan Aerodrome Meteorological Station (ASM), Lengpui chu tun aia changtlung zawk Aerodrome Meteorological Office (AMO) a hlankai an tum a ni.