Aizawl: National Highways and Infrastructure Development Corporation Limited (NHIDCL), Aizawl Regional Office-a Executive Director Virendra Kumar Jakhar chu sawn a ni. A thlaktu atan Adelbert Susungi a ruat.

Thawhlehnia NHIDCL office order tihchhuahah, NHIDCL Executive Director ni lai, chawlh la mek, Jakhar chu sawn a nih thu leh Executive Director thar atan Adelbert Susungi ruat a nih thu tar lan a ni. Virendra Kumar Jakhar chu chu a leave tawp hunah NHIDCL Head office-a inreport tura hriattir a ni bawk.

Nilaini khan Lok Sabha MP Richard Vanlalhmangaiha chuan NHIDCL Managing Director Dr Krishan Kumar chu New Delhi-a a pisa-ah a kawm a. An inkawmnaah hian NHIDCL enkawl NH-306 Vairengte leh Sairang inkar kawng a chhiat nasat zual avanga ni tin mamawh bungraw phurtu lirthei pawh an tlan ngam tawh loh thute MP Richard Vanlalhmangaiha’n a thlen.

NHIDCL Managing Director hian Technical Director Amarendra Kumar pawh an hnathawhna hmuna hna chak zawk leh tluang zawk a an thawh theih nan a enpui tura Mizorama a tirh nghal thu a sawi a. Mizoram enkawltu Executive Director pawh a thar Adelbert Susungi an ruat nghal thu a lo sawi bawk.

Dr Krishan Kumar chuan Vairengte leh Sairang inkar kawng siam nan Rs vbc 50 sanction a nih tawh thu sawiin, fur avanga an thawh chak theih loh thu te leh Sairang-Kawnpui inkar pawh thla khat chhunga thawh zawh an tum thu a sawi bawk.

CM-in lawm thu sawi

Chief Minister Lalduhoma’n sorkar laipuiin NHIDCL Mizoram Regional Office Executive Director atana Adelbert Susngi an dah thar avangin Prime Minister Narendra Modi leh Nitin Gadkari, MoRTH chungah lawmthu a sawi.

Chief minister hian Mizorama National Highway sial hnathawktu bul ber NHIDCL thuneitu sang, Executive Director, Project-in-Charge of Regional Office, Aizawl, Mizoram mawhphurhna chelh turin Adelbert Susngi hi a lo dil tawh a. A hnuah tawngkain a sawi zui bawk a. A dil ang takin sorkar laipuiin Thawhlehni khan Executive Director thar ruatna order hi a tichhuak a ni.