Aizawl: Food, Civil Supplies and Consumer Affairs department chuan thuchhuah siamin, buhfai sem kawngah harsatna a awm loh thu leh oil mamawh lam khawm kawngah huamhauh fal awm lo turin mi tin an ngen.
Nimina an thuchhuahah FCS&CA department chuan tunlaia Mizoram chak lakna kawngpu, National Highway 6/306 that tawk loh avanga bungraw phur lirtheiten harsatna an tawh mek leh pawl thenkhatten nawrh an huaihawt chungchangah ni tin mamawhah harsatna mipuiten an tawh loh nan sorkar chuan theihtawp a chhuah reng tih an tar lang.
FCS&CA Department chuan furpui intan hmain ngawrh takin monsoon stocking a kalpui avangin buhfai sem kawngah harsatna a awm loh bakah, tuialhthei pawh July 23, 2025 zinga report an dawn danin, tun dinhmunah AMC area bikah MS-1, 11,729 L, XP- 27,308 L leh HSD-1, 26,871 L stock a awm mek a. District dangah pawh District Administration-te hriatpuina hnuaiah stock vil chhunzawm reng a ni.
Hetiang a nih lai hian mipuite pawh mamawh ve dangte hre reng chunga oil mamawh lam khawm kawngah huamhauh fal awmlo turin Department chuan a ngen a. Mipuiten harsatna an tawh loh nan sorkarin theihtawp a chhuah mek zel niin an tar lang bawk.