Aizawl: Centre for Environment and Social Justice (C.E.S.J.) chuan nimin khan Zonuam Police Station-ah Tlawng lui tinutu nia an puh, mi pahnih lakah FIR a theh lut.
C.E.S.J. in mi pahnih laka FIR a theh luh te hi Lalremchanga, Luangmual leh Pradan Prathim Phukan, CDM, Blue Mountain Corporation te lakah a ni.
FIR an theh luhah Lalremchanga, Luangmual hian Ainawn vengah leivung paihna hmun a neihah nikum atang khan an leivung paihin mihring nuai 3-4 chuangte pawi a sawi dan hi an zirchiang tan a. An leivung paihnaah hian Aizawl khawpui hmun tin atangin pick-up, 407 leh a aia lian, (ke paruk nei bun thei) te chuan ni tin 200-300 leivung an paih a, an leivung chu Tuithum luiah a lut a, Tuithum lui chuan Aizawl khawpui tui tlan Tlawng lui a fin a, ruah surin Tlawng lui a ti nu ta thin tih an tar lang.
Federation Enclave Develop Blue Mountain (Pradan Prathim Phukan CMD, Blue Mountain Corporation, Luangmual) te hian Ainawn vengah mi lei leh turin in lian tak an sa a, chu an in sakna vung chu Tuikual luiah an nawr liam ringawt a, mi tam takin harsatna an tawh phah bakah Tuikual lui hian Tlawng lui a fin vangin Blue Mountain Corporation te hian Tlawng lui tui tlantu Aizawl mipui nuai tel pawi an sawi tih an tar lang bawk.
C.E.S.J. hian fur ruah sur tam vanga Tlawng lui pump tlak loa nut chhan tam tak zingah Lalremchanga, Luangmual leh Pradan Prathim Phukan CMD, Blue Mountain Corporation, Luangmual te dan loa leivung paih hi kum 2024-25 ah chuan a chhan bulpui lian ber ni ngeia an hriat thu leh, hetianga an mi mal hlawkna tura mipui nuai 3 chuang harsatna an thlen hi sual thiltih a ni lo thei lo va, an thil sual tih hi uluk taka chhui a, an phu tawk hremna an hmuh ngei theih nana hmala turin an ngen a ni.