Aizawl: Assam Rifle ram chhuahsan hman zui dan tur ngaihtuahtu Advisory Committee chuan Civil Hospital, Aizawl hmun tihzauh nana Aizawl Police Station awmna hman a nih theih nan AR ram chhuahsanah Aizawl Police Station dah chu a thuphungin an pawm.
Nimina an chairman Lalduhoma, Chief Minister hova Advisory committee thutkhawm chuan, Mizoram Synod atanga lehkha hmuh te, AR ram chhunga mi mal ram nei court thubuaia lut mek (pending case) chungchang te, AMC, GPC Mizoram State Assembly, Health, P&E leh PHE Department atanga dilna lo lutte an sawi ho.
Chairman chuan, sorkarin a duh dana thutlukna a lo siam mai chu thaa a hriat loh avangin pawl hrang hrang aiawh telna Advisory Committee a din a. A tel tur awm ang hi chu an tel kim thawkhata a hriat thu sawiin, member kal te chungah lawmthu a sawi.
Thutkhawmah hian Civil Hospital Aizawl hmun tihzauh nana Aizawl Police Station awmna hi hman a nih theih nan AR ram chhuahsanah hian Aizawl Police Station hi dah ni se tia Health Department dilna chu a thuphunga pawm a ni a, zirchianna neih zui tura tih a ni.
PHE lamin tui dahkhawlna, hmun pathuma siam an dilna pawh an siam dan tur design te hriatsak hmasak ni se an ti bawk.
Committee hian chhuah lamah kawngpui sial thain a hria a. PWD lamin an lo enfiah ang a, mi mal leh pawl hmunhma a khawih theihte zirchian nise an ti bawk.
Lalmalsawma Pachuau, Secretary, UD & PA chuan Master Plan an ruahman chhin sawifiahin, Culture & Nature Centre, khawvel khawpui changkang danga an lo neih thin ang ngaihtuah ran chunga an duan a nih thu a sawi a. A ram zawng zawng zatve aia tam (52.57%) chu hmun hring, mipuite tana len khaw thawn theihna turin an ruahman chu an sawi ho va, a tul anga la sawi zui zel turin an dah a ni.