MPCC Treasurer Dr Malmalsawma Nghaka chuan sorkarin Mizoram châk lak luhna kawngpui NH-306 a hlamchhiah rei lutuk avangin furpuiah mipuiin harsatna namen lo a tawk chu vanduaithlak a tih thu a sawi.
Ningani khan Dr. Lalmalsawma Nghaka chuan Sairang leh Kawnpui inkar kawngpui chhia hi tlawhin a enfiah a. He kawng hi Mizoram sorkarin September 2024 khan a siamtu Satguru hnen atangin a laksak a. Mizoram sorkar fawng vuantute hian veiin ti tak tak se, thla kalta hun eng emaw zat chhung khan an siamtha hman vek a. Mahse, chutianga ti ta lo vin, mawhpuh tur leh chhuanlam tur zawng reng rengin an phe ta ruai zawk tih a sawi.
Dr Lalmalsawma Nghaka chuan, July ni 7, 2025 khan he kawngpui hi Mizoram sorkar mawhphurhna a nihzia tichiang turin Mizoram sorkar (MPWD)-in NH-306 (Km 118) Kawnpui leh (Km 133) New Khamrang inkar kawng chu NHIDCL hnenah a hlan leh ta si a, NHIDCL tan pawh furpui laiin hma a lak ve theih ta chauh niin a sawi.
Sairang leh Kawnpui inkar kawng chhiat avang hian ni tam tak chhung chu bungraw phur motor an tangkhang tawh tih sawiin, “Lirthei neitute leh lirtheia eizawngte an khawngaihthlak tawh hle. Bungraw chah luttu sumdawngte pawisa a tang nasa hle a, an mangang tawh hle a ni. Ni tin mamawh thil hrang hrang a vang ta hle a, mipui nawlpuite tan harsatna nasa tak a thleng mek a ni,” a ti.
MPCC Treasurer chuan September 1, 2024 atang khan Mizoram sorkarin kawng tha zawk a neih nan tiin petrol leh diesel atangin mipui barhluih chhiah Rs. 2/litre a la tih sawiin, “He road maintenance cess atang ian Rs vaibelchhe tel tak meuh meuh sorkar sum zema lut kha eng atan nge an hman tih zawhna a lian ta hle,” tiin, sorkarin mipui ip atanga sum a pawhpen sak hi kawng siam thatna atana an ti tak tak a nih chuan a hmanna tur dik taka hman a tul tih a sawi.