Wolverhampton Wanderers chuan Portuguese forward Diogo Jota chu chawimawiin an club Hall of Fame-ah an la lut.
July 3 khan Jota leh a unaupa, Andre Silva te chu Spain-a Zamora khaw bulah an chesual a, an pahnih hian an thi a. Wolves hian an player hlui thi ta chawimawi nan hian an club Hall of Fame-ah an la lut a ni.
Wolves director of football administration Matt Wild chuan, “Diogo kha footballer tha chungchuang a ni mai lo a, Wolves player a nih chhung zawng khan a inngaihtlawmna leh a ngilneihna kha a langsar em em reng a, kan zavaiin kan ngai reng dawn a ni,” a ti.
Jota hian kum 2018-ah Wolves chu Championship atangin Premier League-ah a kaipui a, an club tan vawi 131 khelin goal 44 a thun hman a, kum 2020 khan Liverpool a zawm a ni.
Hall of Fame chairman John Richards chuan, “He chhiatna hi a lungchhiatthlak em em a, tun thlengin awih a la harsa a. Hetianga chawimawi ngei hi kan duh a ni,” a ti.
“Hetianga kan chawimawi hian Diogo leh Andre hnaivaite tan thlamuanna tlem tal a thlen kan beisei a. Wolves tantute pawhin hetianga kan tih hi an hrethiam ngei ang a, hmangaihna leh ngaihsanna thinlung an put kan ring tlat a ni,” a ti bawk.
Season tan hmaa an inkhelh hnuhnung bera Celta Vigo nen friendly match an khelh dawnah Wolves chuan Diogo leh Andre te hriat rengna hun hman an tum a ni.
Billy Wright, Derek Dougan leh Steve Bull te chu kum 2008 atanga an tih tan Wolverhampton Hall of Fame-ah hian an la lut tawh a ni.