India wicketkeeper Rishabh Pant chu England Test an khelh mekah a ke tina mah se a ni hnihnaa vaw turin a inlan leh a; mahse, wicketkeeper erawh a ni zui thei dawn lo.
A ni khatnaa a kea an vawm fuh avangin kum 27 mi, Pant hi kal pawh kal thei lovin lak chhuah a ni a. A ni hnihnaah erawh run 37 a siam tawh atanga vaw chhunzawm lehin run 54 a tlin a, India hi run 358 an siamah an thi zo.
Shardul Thakur-a thia India hi 314-6 an nihin Pant hi vaw turin khelmualah a lut a, ding chunga lo lawm hlial a ni a. A vuak leh chhungin Jofra Archer-a vawm chu six a vuaksak nghe nghe.
Archer-a bawkin a vawm hlum chuan ding chungin mipuiin amah zahna an lantir bawk.
Kum 2017-a cricket dan tihdanglam a nih angin substitute fielder Dhruv Jurel chuan Test khelh hmabakah hian kutkawr nen wicket a vil a ngai dawn a, Lord’s-a Test vawi thumnaah pawh khan Pant hian a kutzungtang a tihnat avangin a ai a lo awh tawh.
Tuna a dinhmunah hian an vuak thawh hnihnaah pawh Pant hi a inlan thei ngei tura ngaih a ni a; mahse, Test khelh leh hmabakah a inlan thei dawn em tih erawh a chiuang rih lo.
Left-hander hi car chesualah a thih tep avangin kum hnih chhung a chawl a, nikum September atang khan Test cricket-ah a let leh chiah a ni.