Mizoram châk lakluhna kawngpui pawimawh, Kawnpui leh Khamrang inkar dinhmun chu Adviser to CM (Finance & Technical) TBC Lalvenchhunga hovin Mizoram PWD hotute leh NHIDCL hotute chuan nimin khan a hmunah an en a; a thawm that hna thawh lai mek chu chak lehzuala kalpui nise tih a ni.
Adviser to CM chuan kawng siamtu NHIDCL hotute chu darkar ruk danah an hmalakna report pe turin a ti a, harsatna an neih te pawh sorkar thuneitute hnena thlen hreh lo tur leh rang taka hmalakpui nghal zel an nih tur thu a sawi.
Kawnpui leh Khamrang inkar kawngpui chhia thawm that hna thawh mekah hian NHIDCL contractor chuan Excavator pali leh JCB pahnih bakah Road roller pakhat leh Motor Grader pakhat an inchhawp a, Nilaini zan atang khan Mizoram PWD chuan zan lama lirthei tang buaipui turin JCB pathum an chhawp bawk.
Helai kawngpui siam mek a nih avang hian chhun lamah Aizawl lam pan lirthei te chu Kawnpui daiah leh Kawnpui lam pan te chu Khamrang-ah dan an ni a, zan lamah chhuah an ni thin.
Adviser to CM hi NHIDCL atangin Executive Director thar Adelbert Susungi leh Technical Director Amarender Kumar ten an tawiawm a. Mizoram PWD atangin CE Highway Robin Lalrinawma leh SE Highway Circle I Eddie Zothansanga ten tawiawm a. Kolasib District Bawrhsap leh Addl SP te an kal bawk.