Aizawl: MPCC Spokesperson Dr Lallianchhunga chuan sorkarin sawhthing lei khawl sa hi a tawih nasa tawh hle tih a sawi a; sawhthing lei danah ZPM sorkar hian sawhthing chingtute beisei a pha lo nasa hle tih a sawi.
Ningani khan Dr. Lallianchhunga hian Sairanga sawhthing dah khawmna hmunpui tlawhin, sawhthing an lei khawl sa Mizoram sorkarin a buaipui zui dan a hmunah a en a. “Sawhthing lei khawlsa hi a tawih nasa tawh hle a, chung sawhthing tawih te chu hmun eng emaw zatah paih khawm a ni a. Ruah surin len bo nual tawh mah se, sawhthing tawih an paihna sulhnu erawh hmuh theih a la ni a. Road Map awm miah lo va sawhthing hi buaipui a ni tih a lang,” a ti.
Dr Lallianchhunga chuan sawhthing dahkhawmna hmunpuiah hian hnamdangin Kg 1-ah Rs.3 leh Rs.5 ten an lei a, mutia ten bag khatah Rs 10 hlawhin motor-ah an dah lut thin thu sawiin, “Mizoram sorkarin sawhthing a lei khawl hi thar beisei zat atangin zaa 15 (15.71%) vel chauh a ni a, thar chhuah tura beisei zat atangin zaa 84 chuang (84.29%) a lei hman lo tihna a ni a. ZPM sorkar thil kalpui dan fuh lo avangin sawhthing chingtute’n Kg khatah Rs.50 aia sangin sawhthing an hralh theih loh phah,” tia sawiin, sawhthing lei danah ZPM sorkar hian sawhthing chingtute beisei a pha lo nasa hle tih a sawi.
- MPCC spokesperson zawhna pahnih
- ZPM sorkar thar lakluh ni, Dec 8, 2023-a CM thar, Lalduhoma’n Press Conference a neih tum khan, ‘Kan minister tinte hi an department chan theuh an enkawl dan tur road map ziakin kan nei vek a ni. Chu chu minister tinte kan pe vek dawn a. Chumi dungzui chuan a tlachawp ni loin, ngaihtuah hranpa pawh ni loin, kha policy kan lo duan tawhsa hmang khan an department chan theuh an enkawl dawn a’ tih thu khauh takin a sawi a. Tuna sawhthinga kalpui dan buarchuar tak, kuthnathawktute ti beidawngtu hi ZPM sorkar road map-ah a tel em?
- Hmunphiah hi thar chhuah beisei zat atangin zaa 59 chuang (59.49%) lei loh a ni a; aieng phei chu thar chhuah beisei zat atangin zaa 99 chuang (99.49%) lei loh a ni a. Thlai thlan chhuah lei a nih danah hian campaign laia an sawi uar tak research base a tih engmah a awm lo tihna a ni em?