Joint Civil Society of Mizoram (JCM) chuan nimin khan Kawnpui leh Sairang inkar kawngpui siama, Zoram Hnatlang koh tura an ruahman chu a ngai rih lova an hriat thu an sawi.
Nimin khan JCM chuan Kawnpui leh Sairang inkar kawng siam that hna, NHIDCL in an thawh mek chu a hmunah kalin an enfiah a. Helai hmun an tlawh lai hian Adviser to Chief Minister TBC Lalvenchhunga leh sorkar hotute pawimawh dangten a hmunah an lo tlawh a, lirthei kal theiha kawngpui siam dan tur leh hmalak zel dan turte an sawi ho a ni.
JCM chuan NHIDCL ten Mizoram PWD, MTA leh Drivers/Owners Association hrang hrangte tawiawmna leh tanpuinain, an theihtawpin hma an la tih hmuh theihin a lang tih an sawi a. Hetiang hian tha thlah lo va, hmala chhunzawm zel turin an beisei tih an sawi.
Hetiang hi thil awmdan a nih avangin, JAC chuan Thawhtannia Aizawl Press Club-a thu thar thehdarhtute an kawm tuma NHIDCL chu kawngpui an siam that leh that loh darkar 48 an ngaihchan tur thu leh hmalak a nih loh chuan kawngpui siam tha tura Zoram Hnatlang koh an tum thu chu, a bikin Kawnpui leh Sairang inkar siamtha turin Mizoram sorkar leh NHIDCL-ten theihtawpin hma an la ni-a hriain, Zoram Hnatlang koh tura an lo ruahman chu a ngai rih lova an hriat thu an sawi.
Hetiang bawk hian a bikin NH 44A Darlak leh Tuidam inkar te, Mamit leh Bairabi inkarte, Mizoram chhim lam leh khawchhak lama kawngpui chhe tak takte pawh siam tha chhunzawm zel turin Mizoram sorkar an ngen bawk.