Mizoram chuan badminton mipa champion thar a nei a, Serchhip rawlthar, Vanlalmalsawmzela a ni. Zirtawpnia Yonex-Sunrise P.C. Gabriel Lalliansanga Memorial MBA Senior Official Championship 2025 final-ah Serchhip rawlthar tho, Malsawmhlua (Mama) hnehin a champion.
Hmeichhiaa nikuma Mizoram record siama champion thei naupang ber lo ni tawh, H.Lalrinhlui chuan a nomawi a humhim bawk.
Thawhtanni atanga khelh tan inelnaa ngaihven hlawh ber, men’s singles final-ah hian under 19 player ve ve, New Serchhip Badminton Club (NSBC)-a khel mek rawlthar pahnih an inhmachhawn a. Vengchung rawlthar chuan 21-23, 21-17, 21-14-in P&E Veng rawlthar hnehin champion thar a ni.
Sawma hian semifinal-ah Seeded No. 1 leh champion lai, Saitluangpuia Sailo hnehin Mama hian junior player tha leh hmingchher mek, Sainunmawia Sailo (Mawia) a hneh ve thung a. Tun laia Mizoram player tha ber berten final hi an khel zui.
Final-ah hian Mama chungnung hmasa zawk mah se Sawma a insiam tha a, deciding game-ah tharum a ngah zawkna leh thluak fim zawk a neih hmang tangkaiin MBA Senior Official Championship men’s singles-a champion thei mi tlem tê zingah a hming ziah luh thar a ni ta a ni.
Nikum MBA Senior Official Championship-a champion thei naupang ber nihna record a lo siam tawh, Chanmari West, Aizawl tleirawl, Rinhlui chuan a puitling zel tih lantirin kum 16 leh thla hnih mi niin hmeichhe maltanah a nomawi kawl lai a humhim.
Rinhlui’n final-a hneh tak, Kolasib Hmar Veng tleirawl, Tirza Lalremruati pawh hi kum 13, thla ruk leh ni 12 niin Mizoram Badminton Association (MBA)-in senior huang inelna a buatsaih tawha final thleng thei naupang ber record a siam a. Final-ah hian chak se nikuma Rinhlui record thai chhe thei tur dinhmunah a ding hial.
Final-ah hian Rinhlui’n a tawnhriat ngah tawh zawkna hmang tangkaiin 21-8, 21-11-in hnehna a chang a, Chanmari Shuttlers Club (CSC)-a khel mek, Tirza-i’n a record thai chhiatsak a tumna chu a dang thei.
Rinhlui tan tun inelna hi chhinchhiah thlak tak niin category pathumah final lutin pahnihah a champion a. Women’s doubles leh mixed doubles-ah final lut ve vein women’s doubles-ah hian Lalrempuii, NSBC nen final-ah Ramngaihzuali leh Zoramthari, Sihphir Badminton Club (SPBC) te chu 21-17, 21-16-a hnehin an champion bawk.
Mixed doubles-ah erawh Vanlalhruaia Sailo nen tang dunin final-ah Mawia leh Zoramthari tang dun an hneh zo ta lo thung.
Ramhlun Venglai, Aizawl rawlthar, SPBC-a khel, Mawia hi mixed doubles bakah men’s doubles-ah final lutin a champion bawk a, nomawi pahnih nen a haw.
Men’s doubles-ah hian a û, Saitluangpuia Sailo nen an tangdun a, champion lai leh Seeded No. 1 Joseph VL Ringngheta leh C. Lalramzauva te inkawp nen final-ah inhmachhawnin 21-13, 20-22, 24-22-a hnehin nomawi an la a, MBA-in men’s doubles champion thar a neih phah.
Yonex-Sunrise P.C. Gabriel Lalliansanga Memorial MBA Senior Official Championship 2025 hi Mizoram Badminton Centre, Zuangtui, Aizawla khelh niin Mizorama kum khat chhunga inelna ngaihhlut hlawh ber a ni a. Badminton Association of India (BAI) pawmpui niin a khel tur hian India ram hmun hrang hranga coaching kal mek Mizo player thate pawh an haw vek a ni.
- Men’s singles:
Champion: Vanlalmalsawmzuala, NSBC
Runners-up: Malsawmhlua, NSBC
Women’s singles:
Champion: H. Lalrinhlui, CSC
Runners-up: Tirza Lalremruati, SPBC
Men’s doubles:
Champion: Saitluangpuia Sailo & Sainunmawia Sailo, SPBC
Runners-up: Joseph VL Ringngheta & C. Lalramzauva, MBC
Women’s doubles:
Champion: H. Lalrinhlui, CSC & Lalrempuii, NSBC
Runners-up: Zoramthari & Ramngaihzuali, SPBC
Mixed doubles:
Champion: Sainunmawia Sailo & Zoramthari, SPBC
Runners-up: Vanlalhruaia Sailo, CTBC & H. Lalrinhlui, CSC