Kawnpui leh Sairang inkar kawngpui chhia leh chumi nghawnga lirthei leh driver tangkhangte harsatna sut kian dan ngaihtuahin Inrinni zan khan ZPM Legislature Party informal meeting hmanhmawh neih a ni.
PWD Minister Vanlalhlana kaihhruai thutkhawmah hian Minister leh MLA 16 kalin, Mizorama chak lakna kawngpui siam hna a kal chak thei lo leh, hemi avanga mipui tawrhna thleng mek chu pawi an ti a, hna hmanhmawhthlak thawh dan turte relin mipui harsatna a rang thei anga sut kian dan an rel.
ZPM Legislature Party thu khawm chuan, lirthei tangkhangte a rang thei ang bera an chhuah theihna turin ruahmanna siam chhunzawm zel ni se, Home Minister-in a tih tur tulte lo ngaihtuahin Police lam pawh thahnem zawk tirh luh ni se, an ti.
Lirthei tangkhang enkawltute hian ei leh in tur an tlachham tawh a, a rang thei ang bera ngaihven nghal tura tih niin DC, Kolasib kaihhruaia tangkhangte ei leh in buaipuina atan Rs. 3,00,000 pek chhuah chu nimin khan sem tan a ni. A vil zui turin Kolasib bialtu MLA Deputy Speaker Lalfamkima tih a ni.
Sairang lam hnaiha tangkhangte ei leh in tur pek chungchang Dr. Lorrain Lalpekliana Chinzah leh Jeje Lalpekhlua-ten an enpui ang a, Pathianni khan sem tan nghal a ni bawk.
Kawng siam thatna atan lung mamawhna lian tak awm chu, Mizoram pumah a lakkhawm theih dan kawng dap ni se, tiin an rel a. Kawng chhiatna hmunah hian PWD thuneitu sang chinin awm chilh se an ti bawk.
Pathianni zing khan PWD Minister inah, PWD hotu liante koh khawm an ni a, an hnathawh dan tura Mizoram sorkar duh dante hrilhfiah an ni. He hunah hian Minister te – Dr. Vanlalthlana, F. Rodingliana, Prof. Lalnilawma; Advisers to Chief Minister Lalmuanpuia Punte, TBC Lalvenchhunga leh Er H Ginzalala-ten PWD Minister an tawiawm a ni.
Zirtawpni zan leh Inrinni nileng leh zanah Supply Minister B. Lalchhanzova’n a hmunah a kal chilh a, mipui ni tin mamawhte a rang thei ang bera phurh luh a nih chu theih dan tur a lo enpui tawh bawk.
He kawngpui changtu NHIDCL-te dawr chhunzawm reng niin, chak zawka hna an thawh theih dan turah ruahmanna siampui zel an ni a. Mizoram kawngpui pawimawh a nih avangin Chief Minister Lalduhoma duh danin sorkar sum awm ang angin harsatna awm mek chinfel dan tur ngaihtuah chhunzawm zel tura tih a ni.
ZPM Legislature Party thukhawm chuan kawngpui siam hi ni tin Minister leh MLA pahnih talin tlawh ziah turin an rel a, NHIDCL leh PWD-te hnathawh hi a hmunah endikin an vil thin dawn a ni.
Thutkhawmah hian Mizoram chak lakna kawngpui hi NHIDCL-in rintlak leh tha taka an siam hi ZPM Legislature party duh dan a nih thu sawi a ni. Mipui tana harsatna lian tham a thlen tawh lohna turin PWD pawhin a tul tulah an pui thin bawk ang.
ZPM Legislature Party hian he kawngpui pawimawh avanga harsatna a taka vil turin Crisis Management Committee an din nghal bawk a ni.