Aizawl: ZPM Consultant Rev Dr K Thanzauva chuan ZPM an sorkar theihna chhan pawimawh tak pakhat chu eiru lo tura an intiam vang a nih thu sawiin, vawiin thleng hian an la fihlima a hriat thu a sawi.
Thawhtannia ZPM party in an party pisa-a chhung inkhawmah thusawiin Rev Dr K Thanzauva chuan, ZPM vision chu Pathian rorelna ram a ni tih a sawi a. Kum 1972 Mizoram chu UT a nih atangin vawiin thlenga hmasawnna tithuanawptu chu corruption a nih thu sawiin, “ZPM kan sorkar theihna chhan pawimawh tak pakhat chu, corruption kan ti ve dawn lo, tih kha a ni a. Kan MLA candidate zawng zawngin Pathian hmaah an intiam a, vawiin thleng hian an la fihlimin ka hria a, ka lawm tak zet a ni,” a ti.
Rev Dr K Thanzauva chuan kawng chhiat thu pawh an hria a, siamthat a la ni zel dawn tih a sawi a. Corruption erawh chu CBI, ACB, Lokayukta ten man lovin court-ah te thiam chang mah se, an asset neih zat an hria a. Mizoram mipui rilruah thiam an chang chuang lo va, tuna ram hruaitute hi term tawp thlengin lo rinawm zel tura chahin, an thlan tling leh dawn tih a sawi.