Aizawl: MPYCC Sr. Vice President Ngurdingpuia Pachuau chuan kum 2026 MLA inthlan huna party hma lam hun nei êng berah mipuiin Congress an ngai mek niin a sawi.
Nimina Congress Bhavan-ah MPCC Political session-ah Ngurdingpuia Pachuau chuan, Congress party-in Zoram hmasawn nana a lo thawh nasatzia hi miin an chhut chiang a, an hre chho zel tih sawiin, “Congress party boruak a eng chho zel a, mipuiin kum 2028 inthlan huna party future bright berah an ngai mek a ni. Pathian leh mipui zarah sorkarna kan chan ngei hi ka ring tlat a ni,” a ti.
Ngurdingpuia Pachuau chuan mipuiin an beisei loh anga sorkarin thil a tih a, ro an rel hian an ning thuai thin tih chu kum 10 sorkarah mai ni lo, kum 5 tlin hma pawhin an inning hman hle tih ZPM sorkar hmaa term khat lek sorkar MNF party sorkarah khan a chiang tih a sawi.
‘Min enchhin ve rawh u’ tia thiam thil chi tinreng nena, tha ber leh danglam bik tura inzuar, mipui ten ZPM an thlang tling a, sorkarna an han chelh ve a. Pawn lam atanga thlir ang ngawt a nih lohzia an hmu chiang zel tih a sawi a. Inthlan hmaa danglam bik leh tha bik tur anga mipui hmaa an lo tiam zawng zawngte an palzut tih a sawi bawk.
“An hotupa leh ZPM Party-ah hian mipui rinna a tlahniam nasain, a hmaa anmahni tana awr phiar tawng tawnga tan a, vote-tute rilru an hliam a, anmahni vote tute an inchhir mek a ni. Kum khat leh thla 8 vel chauh an la sorkar a, term khat an chelh zawh meuh chuan duhlotu an ngah tawh viau ang tih hi mipui tam zawk titi a ni,” a ti bawk.