All India Football Federation (AIFF) President Kalyan Chaubey chuan tun season-ah Indian Super League (ISL) chu khelh a nih ngei tur thu a sawi a, tan hun erawh a tlai deuh dawn tih a sawi.
Chaubey chuan Supreme Court-ah thubuai kal mek a awm thu sawiin, hei vang hian ISL khelh tan hun tur sawi theih a la nih rih loh thu a sawi a. Khelh tan hun tur chiang rih lo mah se season thar tur chu khelh a nih ngei tur thu a sawi thung.
ISL khelh a nih dawn leh dawn loh a chian theih loh avang hian football player tam tak dinhmun tur sawi thiam a har hle a, chiang lo takin an awm reng phah a. Season khat tawp chawl tur anga ngaih theiha thil a awm chhoh avangin ruahmanna siam thiam pawh a harsa hle.
AIFF president chuan, “ISL hi khelh a nih loh chuan footballer chauh pawh ni loin, football kaihhnawih mi tam tak a nghawng ngei dawn a. Mi sang chuang a nghawng ang a, a tuar tur hi an thahnem viau ang. Chuvang tak chuan theihtawp kan chhuah ang a, league hi khelh a nih ngei theih nan hma kan la ang,” a ti.
Tun thla tir lamah khan ISL neitu leh huaihawttu, Football Sports Development Limited (FSDL) chuan AIFF hnenah lehkha an thawn a, he inelna hi chawlhpui rih a nih thu an hriattir a ni.
Thla hnih kal taah khan Supreme Court chuan AIFF leh FSDL te chu indawr zui tawh rih lo turin a hriattir a, thuneitu sang lamin thutlukna mumal an neih hma chuan hma la chhunzawm lo turin a ti a ni.
Chaubey chuan, “Court-in thutlukna mumal tak a neih hunah AIFF chuan hma a la nghal ang a, inelna hrang hrang, ISL pawh telin tluang taka kalpui chhunzawm vat a ni ang,” tiin a sawi.
July 11 khan ISL huaihawttu, FSDL-te chuan kum 2010-a AIFF nen inremna thuthlung, Master Rights Agreement (MRA) an ziah chungchangah thil chiang lo a awm avangin 2025-26 ISL season chu kalpui a nih dawn rih loh thu an puang a ni.
India rama football league ropui ber, ISL hi a tlangpuiin September atanga April chhunga khelh thin niin tuna FSDL leh AIFF-te MRA thuthlung neih mek chu December 8, 2025-ah a thi tawh dawn a. Hetiang hunah hian ISL chu thla thum vel chauh an khel hman dawn a. Hetiang a nih avang hian FSDL chuan inremna thuthlung ziah thar an duh a, AIFF nen hian an inrem thei rih lo a ni.