Hindi film hit zet mai Om Shanti Om a a film climax scene lai, meialh vela an awm lai mawlh kha a la hlauh reng thu he film director Sham Kaushal chuan a sawi.
He film climax lai hi a harsat lai ber a nih thu Kaushal chuan sawiin, cast leh crew zawng zawngte himna ngaihtuah nen, meialh tak tak an hman bawk avangin hlauhthawn a nat thu a sawi a ni.
‘Khatih hun lai khan VFX hman a la ni lo a, chuvang chuan mei kan tih alh chawp a ngai a, Shah Rukh Khan leh Deepika Padukone bakah, cameraperson pathum, unit member 60 vel nen, set chhung bikah khan mi 100 vel kang thei kan ni bawk,’ tia sawiin, huphurhawm tak a ni a ti.
‘Hemi scene kan siam chhoh lai phei kha chuan ka stress nasa hle a, sawifiah dan pawh ka thiam lo, fimkhur theihtawp kha a ngai a, mi pakhatin mei a lo ti alh a, chumi chu second tlemte chhunga tihmit leh ngei ngei a ngai a, tihsual kha a thiang lo tawp, heart attack ka nei mai ang tih ka hlauh ber a ni,’ tiin a sawi.
Om Shanti Om hi kum 2007 a tihchhuah niin, Deepika Padukone-i acting debut a ni a, a hun lai leh vawiin thlenga Hindi movie en hlawh berte zinga mi a la ni reng bawk a ni.