Aizawl: Mission Vengthlanga Lalchhuanawma (39) tualthahna thlengah tualthattu nia puh, a nupui Lalremruati chu police-in an man a. He thihnaah a inhnamhnawih ngei tih a inpuang tawh.
Kulikawn Police Station chuan nimin khan he tualthahna thlenga tual thattu nia puh, Lalchhuanawma nupui hi inpuang tawhin, man a ni tawh tih an sawi a. Nimin vek khan court-ah Judicial custody-a dah turin hruai a ni a. He thil thleng hi chhui zui zel a nih thu leh, tun dinhmunah chuan he tualthahnaa inhnamhnawih mi dang tumah an awm hriat a nih lo va, mi dang man an awm lo tih a sawi.
Pathianni zing khan Lalchhuanawma hi thia hmuh a ni. He thihna chungchangah thu zawhfiah turin police-in a nupui leh mi dang pakhat an la a, pakhat zawk erawh chhuah leh nghal a ni.
Lalchhuanawma thihna chungchangah hian a chhung ten Pathianni khan police-ah FIR an thehlut a, Pathianni vek khan chawhnu dar 3 khan Lalchhuanawma ruang chu postmortem a nih hnuah vuiliam a ni.