Aizawl: MNF Senior Vice President Dr R Lalthangliana’n ZPM sorkar chu sum enkawl hlawhchhamah a puh.
Thawhtannia Mizo Hnam Run chhung inkhawma hun hnihnaah thu sawiin Dr R Lalthangliana chuan, GST hniam reng reng chu Finance Commission atangin sum an dawng tha thei ngai lo tih chu hmanni lawkah Union Finance Minister-in a sawi tih a sawi a. MNF sorkar lai khan GST lakluh a pung nasa a, tuna GST tlahniam ta em em hi restricted tender leh departmental-a contract hna inpek a nasat vang pawh a nih theih thu a sawi.
Dr R Lalthangliana chuan kum 2017-18, GST dan hmanga chhiah lak anih atanga a vawi khat nan kum 2024-25 ah Mizoram GST lakkhawm a tlahniam duai tih sawiin, “Covid hunlai pawha la thleng ngai lo a ni. Kum tharah pawh ziaawm lam aiin a hniam zawngin kan kal chhunzawm zel. Tual chhungah pawisa a vang a, sumdawngten inhralh harsa an ti deuh vek. A chhan ni ta ber chu budget figure atanga enin ZPM sorkar hi Finance enkawlah a hlawhchham chiang hle a ni,” a ti.
Sorkarin kum 2024-2025 chhung kha inrenchem kumah puang mah se, Mizoramin leiba cheng vaibelchhe 3133.45 a neih belh niin Comptroller and Auditor General of India (CAG) report-ah tarlan a nih thu sawiin Dr R Lalthangliana chuan, “Covid kan tawrh nasat ber kum pawh khan cheng vbc.1800 chauh kan puk a, kumin hi sorkarin sum a puk tam ber kum a ní. A sum fai pawhin a tam a, GSDP percent atanga chhut pawhin Mizoram leiba san ber kum a ni,” a ti bawk.