Aizawl: Union Education Minister Dharmendra Pradhan hova nimina Bharat Mandapam, New Delhi-ah New Education Policy 2020 kum nga tlin lawmna ‘Akhil Bhartiya Shiksha Sagam, 2025’ chu PM Shri Govt. Primary School, Buangpui, Serchhip district-a zirlai leh zirtirtuten district danga zirna in thlan chhuah 10 dangte rualin biak hmuhtheihna kaltlangin an lo zawm ve.
Mizoram atangin district tina Prime Minister School for Rising India (PM Shri) school tha thlanchhuah – MICE, Aizawl Dist; Govt Primary School Buangpui, Serchhip Dist; Rabung Primary school, Khawzawl Dist; Kolasib Model Primary School, Kolasib Dist; EMRS Chawngte, Lawngtlai Dist; Model Primary School Electric Veng Lunglei; Kawrthah Primary school, Mamit Dist; Govt. PS-I Hnahthial Dist; New Light Primary school Siaha District; Govt. PS-II Ngopa Saitual Dist leh Zokhawthar Primary school, Champhai Dist ten an school atang theuhin he hun hi an lo zawm ve a ni.
PM Shri Govt. Primary School, Buangpui-ah he hun an lo zawm ve na ah Headmaster H. Lalbiaksanga’n a kaihruai a, zirlai leh zirlai nu leh pa bakah khawtlang mi pawimawh leh chanchinbumi ten an telpui bawk.
Akhil Bhartiya Shiksha Sagam hmang hian sawrkar zirna in te chu tihchangtlun chhoh zel tum ni a. A thil tum zingah PM Shri kaltlangin vocational education hmanga zirna kalpui te leh tunlai thiamna hmanga zirna kalpui te pawh a tel.
PM Shri hmalaknaah hian India ram chhungah zirna in thlan bik 13,076 te chu tihchangtlun chhoh mek a ni a. Mizoramah pawh music instructor, language instructor leh sports instructor te la tharin, zirna kalpui mek a ni bawk.