Aizawl: MPYCC chuan Buichali leh Kawnpui inkar kawng siam hna Minister leh MLA ten ni tina vil tur ZPM Legislature Party-in a ruahman chu ZPM sorkarin PWD minister an rin zawh lohzia tichiangtuah an ngaih thu an sawi.
Nimina an thuchhuahah ZPM sorkarin an inzawrh dan lo anga Mizoram châk lakna kawngpui ber siam that ngai pawimawh lova hlimhlawp leh mahni taksa tihdanglam lam an tuipui zawk avanga Mizoram harsatna namenlo a tawh hnuah NH-306 – Buichali leh Kawnpui inkar kawng siam hna, minister leh MLA ten ni tina vil tur an ruahman chu thil tha ang taka lang ni mah se, anmahni sorkar ngeiin PWD minister an rin zawh lohzia tichiangtu leh an thawhpui minister rin tawk lohna ‘No Confidence an Move’ tih an lantirah an ngaih thu tar langin, “Mizoram sorkar awm tawha thil la thleng lo leh thil zahthlak a ni a. ZPM ministry hi a chhunga a buai nasatzia pawn lamah thup rual lohvin a lang chhuakah a ngai,” an ti.
Sorkar inthlahdah avanga anmahni department chan pawh buaipui hman lo leka kawng chhe siam vila forest, sports, social welfare minister adt. te kawng siam vil daih chu kalphung thar hlauhawm leh dawngdahna nasa takah an ngaih thu an tar lang.
Congress Thalai chuan harsatna namenlo a thlen hnu leh thil nih dan tur a thlen vek hnua minister leh MLA ten kawng siam an vil a, PWD E-in-C leh DC ten kawng an tlawh thung chu kalphung thar lehlinzia leh kalphung mumal an neih lohzia tichiangtu nia tar langin, driver tangkhang riltama siamtuten mipui bumna atan thlei bik neia ei tur an sem chu lemchanna dik takah Mizoram mipuiin an ngai tih hre turin ZPM sorkar a hriattir tih an tar lang bawk.