Aizawl: Agriculture Minister PC Vanlalruata leh Adviser to Chief Minister Lalmuanpuia Punte, MLA ten nimin khan Kawnpui leh Sairang inkar kawng siam mek a hmunah kal chilhin an vil.
MLA te hnenah PWD hotute leh kawng siamtu, GOEL Company Manager te chuan Minister Vanlalruata leh Lalmuanpuia Punte te hnenah kawng siamna atana lung lak tur hnaivai a tam loh avangin hmun hrang hrang atangin a theih ang anga lung lakkhawm a nih thu leh, kawngpui siamthat vat a nih theih nan hnathawktuten theihtawp an chhuah thu an lo hrilh.
Minister leh Adviser to CM te chuan mipui ni tin mamawh phur lirthei te khaihlak lova an tlan theihna turin kawngpui vil tha tur leh, a siamthat hna chak taka thawk tur leh, hnathawktute chu tha tak leh ngawrh taka hna thawk turin an fuih a. NHIDCL leh PWD te chu lungrual taka thawk tur leh a tul anga intawiawm tha turin an chah bawk.