Aizawl: Labour, Employment, Skill Development & Entrepreneurship Department Minister Lalnghinglova Hmar chuan nimin khan skill development training-na bungrua/hmanrua hrang hrang phur thei tur a ruahman, ‘Skills On Wheels’ a khuhhawng.
MINECO-a khuhhawnna hun Lalmalsawma Pachuau, Secretary, LESDE Department kaihhruaiah Minister Lalnghinglova Hmar chuan, hei hi Mizoram tana thil tangkai tak a nih a rin thu a sawi a. Thil thar niin tun hi a bultanna chauh la ni mah se a phurawm hle tih a sawi.
Minister chuan, “Mizote hian skill chu kan nei mai zel a, mahse eizawnna a hmang tur chuan sorkar pawmpui te a ngai thin. A bikin thingtlang tan he hmalakna hi a tangkai dawn a. Skill Development kalpui department dang tan a pawh a tangkai ang,” a ti.
‘Skills on Wheels’ hi sorkar laipui Ministry of Skill Development & Entrepreneurship (MSDE) hnuaia project pakhat SANKALP scheme State Incentive Grant (SIG) 2 hnuai a hmuh a ni a. Skills on Wheels vehicle atan Mahindra Bolero Camper 4wd PSD, m2DiCR4 (5 seaters) hman niin, he Bolero Camper hi GeM portal atangin Mahindra & Mahindra Limited, Mumbai atanga lei a ni. A lei nan leh chei mawi nan te, skill training na hmanrua lei nan hian a pum puiin Rs. 17,05,170.00 hman ral a ni.