Nipui bazar inhawng mekah Premier League club-te chuan player lei nan pawisa an hmang nasa tawh hlawm hle a, English club zingah Liverpool chu hmang hnem ber an ni mek.
Liverpool hian German attacking midfielder Florian Wirtz chu British transfer record thar siamin £ maktaduai 116 zetin an lei tawh a, France forward Hugo Ekitike pawh £ maktaduai 69-in an lei leh bawk a. Anni bakah hian Bournemouth left-back Milos Kerkez chu £ maktaduai 40.8-in an lei a, Bayer Leverkusen right-back Jeremie Frimpong pawh £ maktaduai 35-in an lei tawh bawk a. Bazar inhawn chhungin player lei thar nan £ maktaduai 269 zet chu an hmang tawh a ni.
Chelsea chuan player lei thar nan £ maktaduai 212 an hmang tawh bawk a, hmang hnem ber dawttu an ni mek a. Anni hian Brighton forward Joao Pedro chu £ maktaduai 60-in an lei a, Borussia Dortmund left-winger Jamie Gittens chu £ maktaduai 56-a an lei bakah Ipswich Town striker Liam Delap pawh £ maktaduai 30-in an lei bawk.
Arsenal chuan Sporting striker Victor Gyokeres chu £ maktaduai 63.5-in an lei a, Spain midfielder Martin Zubimendi chu Real Sociedad atangin £ maktaduai 60-in an lei a, Chelsea winger Noni Madueke pawh £ maktaduai 50 tling lo deuhin an lei tawh bawk a, player lei thar nan hian £ maktaduai 200 vel an hmang tawh a ni.
Manchester City chuan AC Milan midfielder Tijjani Reijnders, Wolverhampton Wanderers left-back Rayan Ait-Nouri leh Lyon attacker Rayan Cherki te leina atan £ maktaduai 127 vel an hmang tawh a ni.
Manchester United chuan insiam that tumin hma an la nasa hle a, Brentford atanga Cameroon forward Bryan Mbeumo an lak bakah Wolverhampton Wanderers atangin Brazilian forward Matheus Cunha an la lut bawk a, player leina atan hian £ maktaduai 133.5 vel an hmang tawh.
Tottenham Hotspur chuan an manager thar, Thomas Frank hoin player thar lei nan hian £ maktaduai 122.5 an hmang tawh a, an pawisa hman atanga £ maktaduai 55 hi West Ham atanga midfielder Mohammed Kudus an leina niin Bayern Munich forward Mathys Tel chu £ maktaduai 30-in an lei bawk.
Premier League club hrang hrangin June thla tira bazar inhawn tirh atanga player leina atana pawisa an hman tawh zat hi £ tluklehdingawn 1.63 (€ tluklehdingawn 1.87) a ni mek a, bazar khar hmaa an pawisa hman zat hi chu a la san hmel a. Club lian paruk an tih mai – Arsenal, Chelsea, Liverpool, Manchester City, Manchester United leh Tottenham te pawisa hman belh khawm ringawt pawh £ tluklehdingawn 1 a tling tawh a ni.
Khawvela football club zawng zawng zinga tum khat bazara pawisa hmang hnem zual zingah Liverpool an lang a, parukna an ni mek a. Chelsea chu a sang ber niin, nikum nipui bazarah khan khan £ maktaduai 404.4 (€ maktaduai 463) an hmang a. Saudi Arabia club Al-Hilal chu pahnihna niin nikumah tho £ maktaduai 307.7 (€ maktaduai 353) an hmang a, nikuma £ maktaduai 305.1 (€ maktaduai 350) hmangtu, Paris Saint-Germain chu pathumna an ni.
Real Madrid chuan 2019-20 nipuiah khan £ maktaduai 288.6 (€ maktaduai 331) an hmang a, hei vang hian palinaah an awm a, 2022-23 thlasik bazar inhawn laia £ maktaduai 287.7 (€ maktaduai 330) hmangtu Chelsea chu pangana an ni bawk.
Arne Slot te hian Newcastle United atanga £ maktaduai 135 vela Alexander Isak an la lut a nih ngat chuan bazar tum khata pawisa hmang hnem ber hi an ni thei ang.
Premier League lama kai thar pathum – Burnley, Leeds United leh Sunderland te pawhin pawisa chu an hmang nasa hle a, Top 10 huangah an lang pha vek a. Sunderland chu pasarihna niin, player thar paruk lei nan £ maktaduai 100 chuang hret an hmang tawh a, Jobe Bellingham leh Tom Watson hralhna atangin £ maktaduai 37 vel chu an la lut thung.
Burnley chuan player 10 an lei thar tawh a, mi thar leina atana pawisa an hman zawng zawng chu £ maktaduai 70 tling lo hret niin, Leeds United pawhin player thar paruk lei nan £ maktaduai 60 chuang hret chu an hmang tawh bawk.
Fulham chiah chu Premier League club zinga player leina atana pawisa la hmang lo awm chhun an ni a, Crystal Palace pawhin an la hmang tlem a, Ajax left-back Borna Sosa lei nan chiah pawisa an la hmang a, an sum sen zat chu £ maktaduai 2 a ni.