Aizawl: Mission Foundation Movement (MFM) chuan nimin khan Bawngkawn Veng chhunga khuarel chhiatna avanga chhiatawk leh chhawmdawl ngai chhungkaw 35 hnenah buhfai, alu leh sintex an sem.
Disaster Management & Rehabilitation Dept. changtu Minister Prof. Lalnilawma’n he hun hi hmanpuiin, MFM kaltlangin mi tam takin hamthatna an hmuh tawh thu sawiin, “Chhiat kan tawh hian a buai ber chu khawtlang hruaitu te an ni a, local council hruaitute an fakawm hle a ni,” a ti.
Prof Lalnilawma chuan ruah sur nasat vangin Mizoramah chhiatna nasa tak a thleng a, dept. lam atangin theihtawp an chhuah chungin, khawtlang hruaitute tanrualna a lang a, Mizo nunzemawi a lo lang thin tih a sawi a. Hetiang nikhua a MFM te leh pawl hrang hrang an lo pen chhuak thin chu ropui a tih thu a sawi.
MFM hian HT Parekh Foundation Mumbai, CSR kaltlang a fund hmuh hmangin he project hi an kalpui a, chawlhkar hmasa Zirtawpni khan Vaivakawn vengchhunga chhungkaw 35 hnenah tanpuina an lo sem tawh bawk.