Aizawl: Land Revenue and Settlement Minister B Lalchhanzova’n nimin khan e-ram kaltlanga online-a LSC siam hmasak ber chu Directorate of Land Revenue & Settlement Conference Hall-ah online-in a pe chhuak.
Minister B. Lalchhanzova hian February 19, 2025 khan e-ram portal go-live na hun hlawhtling takin a lo hmanpui tawh a. E-ram portal kaltlangin mipuiin ram teh, hmingthlak, ram then leh dilna hrang hrangte online hmanga an thehluh chu, e-ram kaltlang vekin a hmasak dan indawtin detailment siam a ni a, chu detailment siam chu empanelled surveyor ten lo tehin, e-ram portal kaltlang veka process niin, land recording fee leh a tul dangte online hmanga payment pek a ni a. Applicant-te mobile phone-ah download theih turin e-ram kaltlangin a hmasa ber atan digitally signed LSC/RoR (Record of Rights) chu a pe a ni.
Revenue minister chuan India ram hmasawn rual a revenue department an kal ve thei chu a lawmawm a tih thu sawiin, hmachhawp tam tak an la neih thu leh mipuite te tan theihtawpin hma an la mek zel tih a sawi a, mipuite duhthu ala sam tawk lohnaah hriatthiamna a dil nghal bawk.
Inkhawma tar lan a nih danin, e-ram portal kaltlang hian dilna 2,864 a lut tawh a, detailment 1,019 siam tawh a ni a, survey report 690 theh luh fel tawh a. LSC numbering pawh hriat awlsam zawk nan area code hman thar a ni a, LSC lo siam tawh sa zawng zawng pawh digital copy e-ram ah dah luh vek tawh a ni a, offline leh online a application te thuang hnihin surveyor ten an kalpui mek a ni.