Tlanna sum phut hmu mahse mi 35 that tho

Nigeria hmar lam, Zamfara state-a thingtlang khuaa tlan nana an thil phut an dawn vek hnuah mi ru botuten an ruk bo mi 35 vel an that niin tual chhung thuneituin a sawi.

Tun hnai kum eng emaw ti atang atang khan mi sual pawl, an rama bandit an tihte hian sum siam nan mi ruk bova tlanna sum phut an ching hle.

Tun tumah hian March thla khan Kauran Namoda tual chhung sorkar huam chhunga Banga khuaa cheng mi 56 chu ruk bo an ni a. A rutute hian mi pakhat tlan nan naira maktaduai khat ($655; £485) zel an phut niin Nigeria-a chanchinbute chuan an tar lang hlawm.

Tual chhung sorkar chairman Manniru Haidara Kaura chuan mi thah tam zawk hi tha lai an nih thu leh ‘ramsa sah ang maia sah’ an ni tih a sawi.

“Bandit-ten tlanna sum an rawn phut khan kan inkhawm khawm a, an phut ang pawh kan pe a. Chumi hnuah Inrinni khan hmeichhe 17 leh mipa naupang pakhat an rawn chhuah a ni,” tiin Haidara chuan a sawi.

“An thah chhan chu anmahni chauhvin an hria a. Rilru fim nei lo leh mi lainatna nei lo an ni a. An unaute ngei an that tih pawh an hre lo va, Allah hmaah an la ding dawn a ni,” a ti.

Inrinnia chhuah zinga 16 hi damdawi inah enkawl zui mek an ni a, mi an that 38-te ruang erawh bandit-te hian an hlan a rinawm chiah lo va, ruang hi an hlan mang ngai lo ani.

Mi ruk bo leh tlanna sum phut thin tihtawp a nih theih nan kum 2022 khan dan siamin tlanna sum pek chu dan bawhchhiatna tia dah a ni a. Kum 15 thleng lung in tan theih tih ni mah se tun thleng hian tumah tang an la awm lo.

Mi ruk bova an rukte an thih chuan a rutute chu thi tura hrem theih a ni bawk.

Dan khauh tak awm mah se chhungkaw tam tak chuan an chhungte hrehawm taka awmtir ai chuan sorkar ruai lova tlanna sum pek mai hi an ching zawk.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427