Yemen-a mi a thah avanga thi tura tih, Indian nurse Nimisha Priya hremna chu hnuh kir a ni tih Indian Grand Mufti Kanthapuram AP Abubakker Muslaiyar, chuan a sawi niin news agency ANI-in a tar lang.
Priya-i hi July 16-a tihhlum tura tih kha a ni tawh a, Grand Mufti AP Abubakker Muslaiyar-a inrawlha nasa taka a beihsak hnuah Yemeni thuneitute chuan a ngenna chu pawmin a hun thlen hma niah a hun hi sawn a ni.
A office chuan Yemeni khawpui, Sanaa-a mi pawimawh rual thukhawmin Priya-i thi tura tihna hi an paih ta niin a puang a. “A hmaa a hun tur lo sawn tawh, Nimisha Priya-i tihhlum tura thutlukna chu thulh a ni a. Sanaa-a mi pawimawh rual thukhawm chuan a hmaa a hun sawn tawh, thi tura hremna chu thulh hlen turin an ti a ni,” tiin a office hian a puang tih ANI chuan a tar lang.
Priya-i fanu kum 13 mi, Mishel leh a pasal, Thomas te chuan Yemen thleng tawhin Indian Christian evangelist KA Paul zawmin Houthi thuneitute hnenah chhuah a nih theihna turin an ngen dawn a ni.
News agency PTI-in video a tihchhuahah Mishel-i hian, “Ka hmangaih che, nu,” tia Malayalam leh saptawnga a sawi lai a lang a, a tak a ni ngei em tih erawh hriat a ni lo.
Kar hmasa tir lamah khan Ministry of External Affairs (MEA) chuan Priya-i leh a chhungte chu a theih ang anga an puih thu leh Indian sorkar hian ‘a thian tha sorkar’ pawh thubuaiah hian inrawlh theihna a neihah inrawlh phalsak tura a ngen thu a sawi.
Indian Grand Mufti Kanthapuram AP Abubakker Muslaiyar-a hi July 16-a Priya-i tihhlum tura tih tawh sawn theih nana beitu leh hlawhtlinpuitu a ni a.
Grand Mufti-in thuchhuah an siamah India-in Yemen-a palai hmanga a tih theih tawk piah lamah nasa takin a bei tih an tar lang.
“India hian tun hma lamah pawh Gulf ram leh ram dangah pawh thil lawmawm tak tak a lo nawr chhuak tawh thin a. Yemen hi India-in palai hmanga a dawr theihnain tawp chin a nei a, hei hi keini kan inrawlh a tulna a ni ta a ni,” tiin a sawi.
Priya-i hi kum 2020 khan Yemeni Talal Abdo Mahdi-a July, 2017-a a thah avanga thiam loh chantir a ni a. Kum 2023khan Houthis sorkara Supreme Judicial Council chuan a hremna tura an tih chu kaltlangpui tura tiin bail a dilna a hnawlsak a. Thi tura hremna pek niin July 16, 2025-a tihhlum tura ruahman a ni.
Yemen-a Muslim danah a thihna pumpelh tur hian a mi thah chhungte hnenah zangnadawmna tha tawk tak pek a ngai a, hemi tur hian a chhungte leh amah khawngaihtute pawh an tang hle a, sum pawh tam tak an tuak hman a ni.