Boxing Federation of India (BFI) chuan Brazil leh Kazakhstan-a World Boxing Cup neiha India aiawha feh chhuak zinga medal la boxer 17-te insem atan Rs. nuai 17.5 an dah hrang tih an puang.
Gold medal latute chuan Rs. nuai hnih theuh an dawng dawn a, silver medal latuin Rs. nuai khat an dawng ang a, bronze medal latu chuan Rs. 50,000 an dawng dawn bawk.
India chuan kumina New Delhi khawpuia World Boxing Cup Finals neih tur atan inbuatsaihna an kalpui tan nghal bawk.
India hian September thlaa Liverpool-a World Boxing Championships neih tur atan leh he mi hnua New Delhi-a World Boxing Cup Finals atan inbuatsaihna an kalpui tan tawh a. Patiala, Punjap-ah camp neiin ngawrh takin inbuatsaihna hi an nei mek a ni.
China chuan BFI hi an bepawp a, junior, sub-junior leh elite level vela thawhho theih dan turte an sawi dun a. An inrem thei a nih chuan training camp-te an neih dun thin dawn bakah sparring-te pawh an tiho thin dawn a ni.
Ajay Singh, BFI President-Chairman chuan, “Khawvel huapa kan boxer-te tha taka an che thei hi a lawmawm hle a, lawmman an dawn theih avangin ka lawmpui khawp mai. Hetiang inelna sanga India hming an tilang thei hi an chhuanawm hle a, boxing khawvela India hi kan nep bik lo tih a chiang,” a ti.
“Tun hi a bul tanna chauh a ni a. Kan boxer zingah Mary Kom te, Vijender Singh te hi tam tak an awm a. Kan tuai hriam zel ang a, khawvela inelna sang ber ber, Olympic Games-ah pawh tel thei turin kan chher hlawm dawn a ni,” a ti bawk.
World Boxing Cup vawi hnih neihah India chuan medal 17 an la a. Gold medal pali lain, Sakshi (54kg), Jaismine Lamboria (57kg) leh Nupur (80+kg) te chuan Astana ah gold hi an la a, Hitesh Gulia (70kg) chuan Brazil-ah a la thung.
Hitesh leh Abhinash Jamwal (65kg) te chuan Astana leh Brazil-ah hian medal an hlawh chhuak ve ve a, Hitesh hian gold pakhat leh silver pakhat a la a, Abhinash hian silver pahnih a la bawk a ni.
Pooja Rani (80kg), Minakshi (48kg), Jugnoo (85kg), Hitesh leh Abhinash te chuan silver medal an la a, Sanju (60kg), Nikhil Dubey (75kg) leh Narender (90+kg) te chuan bronze medal an la bawk a ni.