Aizawl: Mizoram Contact Health Workers’ Association (MCHWA) chu nimin chawhma khan sorkarin post 100 a lak turah mi 50 tal, National Health Mission (NHM) hnuaia contract health worker hna thawk laite dah ngheh phutin chief minister bangla gate bulah an pungkhawm a. Mizoram sorkar erawh chuan an tan reservation pek a remchan loh thu an sawi thung.
MCHWA chuan Mizoram sokarin Health Worker regular post 100 direct recruiment a lak tura advertisement a chhuah ta mai hi hriatthiam har an tih thu an sawi a. Hun rei tak atanga an lo nghah tawh leh an lo beisei ve em em, Minister-te pawhin a an lo sawi hmuh, seniority angin a tahtawlhin dahnghet tura an ngaih laiin, tuna hetianga ruahmanna a awm ta pawm harsa an ti a. Chuvangin, an duh leh beisei ang ngeiin sorkarin post 100 a lak turah mi 50 tal NHM hnuaia Contract Health Worker hna thawklaite hi dahnghet ngei turin an phut tih an sawi.
Hei bakah, tuna Health Worker advertisement chhuakah hian NHM hnuaia thawklai ten an dil ve ngei theih nan computer certificate neilo leh kum over tawh, hun rei tak Mizoram hmun kilkhawr tak taka awm thin te (computer zirna hun leh hmun pawh awm lo) hi hrethiamin, an dil ve theih dan tur sorkar hian ngaihtuahsak an phut thu an sawi bawk.
Hetih lai hian, nimin vek khan sorkar chuan thuchhuah siamin, MCHWA thil phut chungchanga thil awmdan sawi fiahin, an tan reservation pek a remchan loh thu an sawi ve thung.
- An thil phut chungchanga thil awm dan sorkar sawi fiahna:
- Health Worker Recruitment Rules, 2011 (as amended 2024) in a sawi angin Health Worker post ruak hi 100% direct recruitment-a hnawh khah tur a ni. Chuvangin, health worker lakna tur hi open advertisement kaltlangin direct recruitment chauhva kalpui tur a ni. A dil thei/qualify apiang examination leh personal interview-a tithate lak mai tur a ni.
- The Mizoram Direct Recruitment (Conduct of Examination) Guidelines, 2018, DP&AR Notification No.A.12026/1/2017-P&AR(GSW) dt. 09.02.2018 in a sawi angin sorkar hna eng pawh direct recruitment-a hnawhkhah tur reng reng chu Written Examination leh Personal Interview kaltlanga tih tur a ni.
- MCHWA-te tan hian The Government of Mizoram Regularization of Centrally Sponsored Scheme (CSS) Employees Scheme, 2024 a awm a. Chumi dan hmang chuan a tling (eligible) te chu regularize theih an ni.
- Sorkar hna lak chungchangah a bika induhsakna neih hi India Constitution Article 14 & 16 kalh a nih avangin, tute emaw induhsak bik hi a rem chang lo va, India Constitution provision bawhchhiatna a ni.