MNF Publicity Board chuan Chief Minister Lalduhoma’n car man to a lei thar a sawi fiahtir dan chu Zoram mipui hmuhsitna leh zah lohna nasa tak an nih thu an sawi.
Nimina Aizawl Press Club-a chanchinbumi an kawmnaah MNF Publicity Board Member Lalremruata Chhangte chuan, chief minister-in inthlan campaign laia a thutiam leh ZPM sorkar lak luh ni ngeiah pawh chanchinbumite hmaa a thusawi bawhchhiain June 17, 2025 khan car man to tak, Rs. 29,79,000 man, Toyota Innova Hycross a lei thar a. A thutiam chiang taka a bawhchhiat avanga mipui lam atanga sawiselnaah ngaihdam dil a hneka ZPM party thupuangtu hmanga a insawi fiah dan hi Zoram mipuite engahmah a ngaih lohna leh hmuhsitna nasa tak a nih thu a sawi.
Lalremruata Chhangte chuan ZPM thupuangtuin chanchinbumite hmaa a sawi angin, CM car lei thar lei chu state khat CM chuanna atan chuan car pangngai mai nia, mi ramah chuan mi satliah car ang, hmeichhe khalh tawka ngaih, naupang football khel tur hruaina tawk angah CM Lalduhoma’n a lo ngai a nih chuan car man to a tih chu cheng engzat man chin nge, tih mipui hmaah sawi fiah tel turin a phut tih a sawi.
MNF general secretary ni bawk, Lalremruata Chhangte chuan, “Mahni intiamna ngei, awlsam taka bawhchhe nghal mai duh ram hruaitu lu ber atana Mizoramin a nei mek hi thil vanduaithlak tak a nih piah lamah, a insawi fiah zui tak dan phei hi chu amah thlang tlingtu leh chhiah petu mipuite nasa taka diriam zuina a nih avangin mipuiten an ngaihdam theih a rinawm loh a ni,” a ti.
Mizoram sorkar dan ding lai, GAD Office Memorandum ang chuan CM tan hian car Rs nuai 15 man aia sang lei phal a ni lo tih sawiin Lalremruata Chhangte chuan, “Tuna chief minister car thar Rs nuai 30 man deuhthaw lei thei tur hian dan ding lai chu a bik taka pawh fan hial ngai a ni,” tiin, dan ding laiin a phal chin aia to daih lei thei tur hian GAD chu April 24, 2025 khan dan ding lai pawh fanna thupek hi siamtir a nih thu a sawi.
“Sorkar dan ding laiah ‘sorkar motor lei thar reng reng a var (white) emaw, off white emaw a ni tur a ni’ tih a nih laiin chief minister car lei thar hi a dum (black) a ni leh hlauh bawk a. Sorkar motor reng reng mi mal hminga register lovin sorkar hnathawkte designation anga register thin a nih laiin, tuna chief minister car lei thar hi mi mal hminga register a nih leh zel avangin he car thar lei dan hrim hrim pawh hi a ngaihthatthlak loh,” tiin Lalremruata Chhangte chuan a sawi bawk.