- Jeff Tandy V.L. Hlawndo
Kan kawt kawngpui alkatra luan hi fur chhia avangin hmun thenkhat a khuar leh thin a, chumi chu puitu (helper) tel lovin cement, balu leh rawra chawhpawlhin kei ma’n ka hnawh khat zauh zauh thin a, cement la nem laia ni 2/1 chhunga lirtheia chîl pherh a nih loh nan thing leh leirawhchantein ka chhinchhiah huàl a, hemi bak hi motor lian kal theihna khawpa la zau a la ni a; mahse, chuti chung chuan (tum khat chu) lir theiin an lo rap pherh darh vek mai a. Kan awmna lai hi traffic jam thinna khawp pawh a ni, Aizawl dai fêm pawl a ni a; mahni tih theih ve zawng tlem te te theih ang anga kan lo tih ve tih chhiat a ni a, a bul ka tan tha leh hian lir thei khalhtu thenkhat rilru a ti langin lir theih khalh an fimkhur lo tihna pawh a ni thei ang;
Ka thil tih tlem ka’n sawi tak nain, kei aia ti tha hi mi dangte pawh an tam ang; entir nan, tual upa pakhat leh a nupui chuan, kawngpui sira tui luan kawr, tui luang thei lo khawpa kum eng emawti chhung leiin a hnawh khah chu an an paih fai vek a ni. Hemi atan hian kar khat vel chu tha an seng ngeiin a rinawm.
Lirthei khalhtu thenkhatte hi chuan kawngpuiah eng te nge awm tih ngaihtuah lovin motor an khalh thin tih a lang a, chu chu tuna kan sawi atan chauh hian ni lovin, kawngpui tan zawng emaw, a eng lam hawi zâwng pawha naupang, mi ang lo leh mi chak lo zawk te kawnga an kala an him nan, lir thei khalh fua fua loh a pawimawh tih hi hriat ni rawh se.