Aizawl: Tun dinhmunah Hulhliap Short Stay Centre-ah mi 274 enkawl mek an ni.
Nilaini chawhma khan Core Committee Hulhliap SSC thutkhawm vawi 7-na chu SAD Conference Hall-1, MINECO ah an chairman, Malsawmzuala Ralte hova neih a ni. Thutkhawma Member Secretary, Dr. Lalhriatzuali Ralte, Director, Social Welfare-in a tar lan danin, Hulhliap SSC 2nd batch chu July ni 21, 2025 ah tan niin, a ni hian hming ziak lut 544 an awm a. Tunah hian mi 274 an la awm a ni.
Thutkhawmah hian admission chungchanga lut thei tur leh luh dan tur te sawiho a ni a. Task group hrang hrang pariat, Convener leh Member Secretary ten anmahni Task Group hmalak tawhna leh sum hman tawh dan te report an pe nghal a. Aftercare and Skilling program pawh sawiho anih hnuin 3rd batch atanga an kal zel dan tur ruahmanna an siam nghal bawk.