Aizawl: Aizawl Traffic SP Ruatsanga Ralte chuan naktuk atangin Aizawl khawpui chhunga lirthei intlakchhawk dan thar kalpui chhin a nih tur thu sawiin, sorkar ruahmanna thar chu mipuiin zawm vek turin a ngen.
Nimin khan a pisa-ah chanchinbumi kawmin Aizawl Traffic SP Ruatsanga Ralte chuan August ni 1, 2025 atangin Co-ordination Committee on Traffic Management ruahman angin, lirthei intlanchhawk hian Aizawl khawpui zawng zawng huam lo vin, khawpui chhung hmun lun zual lai Bawngkawn atanga Kulikawn inkar Chaltlang leh Ramhlun paltlangin Chanmari, Zarkawt, Dawrpui leh Sikulpuiawn huam chhungah te, Sikulpuikawn atanga Chanmari West inkar, Temple Square, Vaivakawn leh Hunthar veng paltlangnaahte chauh intlan chhawk hi kalpui chhin a nih tur thu a sawi a. Heng kawngpui dung tar lan loh zawngah chuan tlan theih vek a ni ang a, hei hian lirthei No Entry period nei hrangte erawh a huam lo tih a sawi bawk.
Ruatsanga Ralte chuan Taxi chi hnih – ke hnih nei leh ke li neite pawh sticker pathum – A, B leh C hmanga intlanchhawka chawlhkar khata ni hnih tlan loh ni an nei thin chu chawlhkar khata ni khat chauh tlan loh ni an neih theih nan sticker panga – A, B, C, D leh E hman tir an ni dawn tih a sawi a. Intlanchhawkna dan thar hi August 1 atangin thla khat chhung enchhin tur a ni a, lirthei tlan loh nia m-Pass hmanga tlan phalna permit pek thin chu ni tin khawsak phung mamawh leh thil tul bik, essential service tan chauh pek a ni tawh dawn tih a sawi.
Aizawl khawpuiah lirthei veivak a pun dawn avangin a hmun ni lova lirthei dahte uluk taka vil a ni dawn tih sawiin Aizawl Traffic SP chuan, hemi bawhzui tur hian AMC leh Traffic Police thawh dunna hnuaiah flying squad din a ni a, an ni hian dan bawhchhiatna hrang hrang a bikin kawngpui dung, phalna hmun ni lova lirthei dahte uluk takin an vil dawn tih a sawi a. He ruahmanna hi mipui samkhaina tura duan a nih angin zawm vek tur leh man ngaia tumah awm lo turin a chah.
Lirthei intlanchhawk hian zing dar 9:30 atanga tlai dar 6:00 thleng a huam a; Inrinni, Pathianni leh sorkar chawlhah chuan lirtheite chu dan pangngaiin an tlan thei dawn a ni.