Luis Diaz chuan £ maktaduai 65.5-a Bundesliga champions Bayern Munich zawmin Liverpool-ah ‘a tih tur a hlen’ niin a sawi.
Colombia international hi German club-ah hian kum li daih hun hmang tura inziak lutin Anfield-a kum thum leh a chanve hun a hman chu a zo ta.
Kum 28 mi hi Liverpool-in season thar inbuatsaih nana Inrinnia AC Milan an hmachhawn tum khan a hma hun a chian loh vangin khelhtir lo.
Bayern hian thla tir khan £ maktaduai 58.6-in an lo dawt tawh a, hnawl a nih hnuah kartawp khan £ maktaduai 65.5-a dawr nawn lehin Liverpool-in an pawm ta a, Diaz hi medical-a tihfel ngai tifel turin an chhuah zui a ni.
Winger hian Reds hi Premier League champion ni chungin a chhuahsan dawn a, nomawi pali lakpui hmanin a kalsan dan tur chu ‘inmang thana duhthusam’ niin a sawi.
“Beiseina tam tak nen ka lut a, hlawhtlinna kan chanhote chhuang tak chungin ka chhuahsan dawn ta,” tiin Diaz hian Instagram-ah a tar lang.
“Mi duhawm tak tak tak, thawhpui nuam, nasa taka min puitu coach-te leh fan duhawm tak tak ka tawng a. Liverpool hi special team an ni a, ka thinlungah a awm reng tawh ang,” a ti.
“Tih tur hlen nia inngaiin ka chhuahsan tur hi a lawmawm a, a ropui berah champion nia chhuahsan hi a hlu a ni,” a ti bawk.
Diaz hian January, 2022 khan Porto atangin £ maktaduai 37-in Liverpool hi zawmin Anfield-a hun a hman chhungin vawi 148 a khelhah goal 41 a thun.
A season hmasa berah FA Cup leh EFL Cup lakpui nghalin kum 2022 hian Champions League final-ah Real Madrid an hneh lo thung.
Season liam ta kha a hun hman that ber niin inelna hrang hrangah goal 17 a thun a, Liverpool chu Premier League-ah a champion-pui nghe nghe.
Winger an hralh leh takah hian Liverpool hian tun nipui bazarah player hralhna £ maktaduai 115 an nei ta a. Florian Wirtz, Hugo Ekitike, Jeremie Frimpong leh Milos Kerkez lei nana £ maktaduai 270 an hman tam tak an phuhru dawn.