Aizawl: Office of the Registrar, Cooperative Society buatsaihin International Year of Cooperatives – 2025 hnuaia hmalakna peng pakhat ‘Thisen pek Runpui’ chu RCS Office, Babutlang-ah nimin khan neih a ni. Co-operation Minister P.C. Vanlalruata chuan khuallian a hmanpui.
Thisen pek hmaa inkhawmah Minister PC Vanlalruata chuan khawvel nuam zawk leh boruak tha zawk siam a, midangte tana luanchhuah chu Co-operative thil tum pawimawh tak a nih thu sawiin, UNO pawhin a ngaih pawimawh avangin kum 2025 pawh International Year of Cooperatives (IYC) tia a puan hial thu a sawi a. Thisen chu mihring nunna bul leh midangte nena inkungkaihna thuk tak lantirtu a ni tiin, thisen pek pawimawhzia a sawi bawk.
Inkhawma khual zahawm Cooperation Department Secretary Amit Sharma leh Co-operative Societies Cooperative Societies Registrar John LT Sanga te pawhin thu an sawi.
Inkhawm neih zawhah thisen pek runpui neih nghal niin, Cooperation department leh a hnuaia Society hrang hrang atangin thisen unit 83 pek a ni. Thisen hi Civil Hospital Aizawl-a Blood Bank thawktuten an laksak a ni.