Thawhlehnia ZPM thupuangtuin chanchinbumite hmaa a thusawiah khan chief minister car thar chu a to loh thu leh hmeichhe khalh tawk, naupang football khel turte hruaina tawk lek a nih thu a sawi mauh mai a, a zia lo viau.
Ram hruaitute chu zin nasa an ni a, lirthei neih chu a ngai ngei mai, mipui pawhin kan hrethiam viau. Mahse, tuna kan CM hi chu heng zawng zawng ngai ti lotu, mipui hmaa campaign auhlaa lo nei fo tawh a ni a, chuti a ni chung chung chuan an han tling ta cheng a, kan ram hruaitu lu ber lo ni tawh zawng zawngte aia sang vahin lirthei a han lei ta mai a, mipui ngaihven a hlawh lo thei lo a ni.
A hnungzuitute lah chuan mi rama vantlang lirthei mai a nih thu han sawi ve bawk mah se, mi rama awm kan ni lo tih hi hriat a tha a, kan ram sum dinhmun chhiatzia leh bill tlem te te pawh tang a tamzia hi – sorkar pawhin a hnathawkte hlawh a pe lui tawk tawk a nih laia hetiang car manto a nei leh kher bawk nen hian sawi loh theih loh hi a ni ve bawk a ni.
Khawvel a changkang zel a, car satliah leh car changkang hi kan hre ve zel tawh a, internet hmangin a man zat lah awlsam taka en theih a ni ve zel bawk nen, khawvel hmasawnna hmang thiam mipui kan awm tawh laia an pute thil neih a sawi nep zawnga an la khawsa duh hi an tih loh tawp tur niin a lang.
Ram hruaitu chuan lirthei a mamawh a, veivah leh zin nante pawh an hmang duh ang tih hi rin thiamsa vek a ni. Mahse, nasa taka mipui hmaa lo sawi lawk tawhte an nih miau avangin mipuiin kan en bik a, kalphung thar mawlh hi kan zo lo lek lek zawk a ang thin.
Ngaihven hlawh kan duh luatah hian thil hi kan sawi mai thin nite hian a lang a, hei hi sorkar pawh hian inven a ngaihna lai ni pawhin a lang a, kawngchhia vanga mipuiin kan kawh rawn mek laia boruak thlak tum niawm taka an chet hunte hi a fuh lo viau. Kalphung thar zuartute an nih ang ngeiin, fimkhur tak leh ngaihtuahna zau tak hmangin chet la mawlh tawh teh se.