Lirtheia eizawng pawl hrang hrang 22 intelkhawmte chuan Mizoram hmun hrang hrangah kawng chhia vanga harsatna an tawk chu pawi an tih thu sawiin, August 4-9, 2025 chhungin ‘Tlan Chawlh’ an puang dawn.
Nimin khan Hunthar, Sairang Raod-a Mizoram Truck Driver Association pisa-ah chanchinbumite an kawmnaah, lirtheia eizawng pawl hrang hrang intelkhawmnaa chief convener Robert Lalrinawma chuan, Kawnpui leh Sairang inkar kawng chhe nasa chu lirthei te tana, tlan nuam taka siam tura sorkar an lo phut tawh thu a sawi a, tunah hian kawng chhe thawm that kawngah hmalakna awm mahse duhthusam a ni rih lo hle tih a sawi a. Tun laia Mizoram kawngpui pawimawh chhe lutuk chungchang sorkarin an phutnain an hun tiam a lo ral tak avangin hmalak zel dan tur an rel hnuah, August 4-9, 2025 chhungin tlan chawlh an puang tih a sawi.
Lirtheia eizawng pawl hrang hrangte hian he an hmalakna hi, Sairang-Vairengte (NH 306/06) kawng siam mek chak zawka hnathawh a nih theihna tur a nih thu an sawi a. Hei hian bungraw phur chi lirtheite a huam tur thu an sawi.
Hun tiam chhunga tlan nuam taka kawng sorkarin a siam thei lo a nih chuan na zawka hmalak an tum tih an sawi a. An hmalakna chu lungawi loh lantirna lam a nih loh thu leh tha zawka sorkarin kawng a siam theih nana sorkar an puihna tur a nih thu an sawi.
Robert Lalrinawma chuan August 4, 2025 hmain Kawnpui leh Sairang inkara lirthei tangkhang zawng zawngte chu insaseng vek tura an hriattir thu leh lirthei tangkhangte chu chhuah vek turin sorkara thuneitute a ngen bawk.
Mizoram chak lakna kawngpui pawimawh a chhiat chungchangah sorkar leh NHIDCL inpuhtawnna awm chu tha lo an tih thu Robert Lalrinawma chuan sawiin, kawng chhia te hi a neitu chu state sorkar a nih thu leh hma la chak turin NHIDCL-te chu na taka nawr zawk tur an nih thu a sawi a ni.