Aizawl: Odisha khawpui Bhubaneswar-a Hotel Fortune Park Shishmo-ah Indian Institute of Forest Management (IIFM)-in a buatsaih, Green Climate Fund Readiness & Preparatory Support Phase III chu LR&S Minister B. Lalchhanzova’n khuallian niin a hmanpui.
Workshop hawnnaah B. Lalchhanzova’n thu sawiin, khawvel sik leh sa inthlakin ram thang mek te a nghawng nasa hle a, Mizoramah ngei pawh sik leh sa inthlakin leimin leh tui lian te a thlen bakah mipui ei zawnna a nghawng nasain, chumi do let dan tur leh sik leh sa inthlak mila ei zawnna her remte leh hemi in a nghawng hrang hrang awm theite dawnsawn dan lo zir thiama hma lo lak dan tur atan UNDP hnuaia GCF hman dan tur zirchianna hun siam niin, chuta a tel thei chu lawmawm a tih thu a sawi.
B Lalchhanzova chuan Mizoram leh India hmarchhak state te chu GCF hmang tangkai mamawh berte zinga mi an nih a rin thu sawiin, India hmarchhak state-te tan emaw, Mizoram tan bik emawa hetiang inrawnkhawmna leh inzirtirna hun hi Mizoramah neih a nih ve theih nan Ministry of Environment, Forest and Climate Change leh IIFM hotute chu a ngen nghal bawk.
Workshop-ah hian Odisha, Chhattisgarh, Jharkhand, Bihar, West Bengal leh Mizoram atangin sorkar department hrang hrang official bakah NGO eng emaw zat an tel.
Green Climate Fund hi United Nations Framework Convention on Climate Change (UNFCCC) leh Paris Agreement hnuaia kum 2010 a a din niin, US dollar billion 100 dah a ni. Khawvela Climate Change fund lian ber a ni.