Aizawl: PWD Minister Vanlalhlana chuan nimin khan Mizoram châk lakna kawngpui pawimawh, Kawnpui leh Sairang inkar a that tawk loh avanga harsatna thlengte sutkian a nih thuai theih nan sorkarin ruahmanna a siam thu leh kawng siam that hna pawh ngawrh taka kalpui mek zel a nih thu a sawi.
Ningani khan PWD Minister hian National Highway – 6, Sairang – Buichali – Kawnpui inkar kawng thawmthat hna kalpui mek chu a hmunah kalin a endik a. Kawng thawmthat hna chak leh sawt zawka kalpui a nih theih nan Minister leh MLA ten ni tin an vilpui bakah, PWD hotuten a hmunah riahchilha an vil thu sawiin, “Mizoram tana kawng pawimawh tak a nih avangin lirthei tana tlan tlak leh nuama siam vat a tul a ni,” a ti.
PWD leh NHIDCL hmalakna tichak tura khawtlang hruaitute, tlawmngai pawl hrang hrang, lirthei hmanga eizawngtute leh lirthei khalhtute inpekna leh tawiawmnaah lawmthu a sawi a. He kawng siamthat nana hmalakna leh an inpeknaah rah duhawm tak hmuh thuai beisei a nih thu a sawi.
Kawng siam that hna a endiknaah PWD Minister hi Sports Minister Lalnghinglova Hmar leh Lalchhuanthanga, MLA-te’n an tawiawm a. Er. H.Zoramliana, E-in-C, Er. David Sapzova, CE (Roads), PWD-a thawktute leh Kawnpui leh Khamrang khawtlang hruaitute an tel bawk.