Aizawl: Chief Minister Lalduhoma chuan Mizorama rel kawng kal zel turin Thenzawl Peace City chu hla vak lovah paltlang thei se a duh thu NF Railway (Construction) General Manager AK Chaudhary a hrilh.
Ningani khan chief minister hian a pisa-ah Chaudhary leh a thawhpuite kawmin Thenzawl chu Peace City atana siam tum a nih thu leh master plan siam hna an tan mai tawh tur thu sawiin, chhim lama rel kawng kal zel tur hian Peace City hi a daifem, hla vak lovah paltlang thei se, station hi hla lutuk lo se a duh thu a hrilh a. An preliminary survey-ah chu chu lo ngai pawimawh turin a chah.
Chaudhary hian Thenzawl kianga kaltir an tum dan report chu kumin October vela hriattir hman a tum tur thu a hrilh.
An inkawmnaah hian Sairang rel station hawng tura Prime Minister Narendra Modi-a’n sawmna a tihhlawhtling thei dawn a nih chuan inbuatsaih a ngai a. Hawnna inkhawm neihna hmun tur te, Hortoki leh Mualkhang Station a tlawhna atana helicopter tumna lo siam lawk te, rel kawng a endik nana special coach lo buatsaihte a tul tur thu an sawi a. A rang lama inbuatsaih tur leh an enho hun atan August 19 an ruat.
Union railways minister-in a lo tiam tawh anga Sairang Rel Station chu world class-a siam zui dan tur leh Rajdhani Express a rang lama tlantir nghal dan tur te pawh an sawi dun.
Chaudhary hian rel kawng leh station-te hi chu hawn theiha peih a ni tawh a. Amaherawhchu, Sairangah hian Secondary Maintenance Facility Centre for Coaches chu an sa leh mek a. Hei hian thla khat leh a chanve vel a awh dawn avangin an sak zawh hun hi central chuan an ngaichang leh mai thei, tiin an hmalakna kal mek te chief minister hi a hrilh.