Kawngchhia avangin lirthei lian a rawn tlan tha lo a, kawng lakah an din fo a ngaih avangin bungraw phur lirthei an rawn lut tlem hle.
Chung zingah chuan tuialhthei phur pawh an bang bik lo a, Mizoram in oil kan mamawhna a san ve zel avangin tuialhtheiah harsatna kan tawk chho mek.
Kawng laka tangkhangte an rawn lut zeuh a, oil phurtute an rawn thlen apiangin pump tinah traffic jam siam khawpin lirthei neitute kan intlar a ngaih phah a, dan lova zuartute lahin inhralhna tur remchang an lo zawng ve reng bawk. Thenkhatin in lama dahthat neih tumin an lo hmanhlel a, midang vengthawng lek lovin an lo che zui bawk. Kan rilru hi a piangsual lek lek tawh hi a ang thin a ni.
Heti hian i ngaihtuah teh ang. Hmasawnna kawng hrang hrang avangin kan khawsak pawh a nuam chho tan viau a, lirthei kan nei fur hlawm tawh a, nitin chelek chhuah ve reng kan tum a, hnai te te pawh kein kan kal peih tawh lo a, kan hrisel lo telh telh bawk niin a lang.
Tuna tuialhthei lama harsatna kan tawhte hi harhchhuah nan hmang ila, ke in kal tam tum ila, public transport (bus, taxi,etc.) hman uar nan hmang ila, kan khawpui a thawl mai bakah, ke in kan kal tam bawk ang a, kan hrisel phah ngeiin a rinawm bawk.
Lirthei a tam tawh viau a, nitin chelek reng kan tumna rilrute hi paih hret hret ila, changkang tur leh hrisel tur chuan taimak mai bakah, inuluk a ngai tih hre thar chungin, tun hun hi harhchhuah nan hmang ila, tuialhthei a van avanga kan phili leh, midang ngaihtuah lek lova mahni inhaivur kan tumna rilru hi i paih bo daih ang u.