Aizawl: AMC Ward No. V Corporator Rosiamngheta chuan khua leh tui inchian a tul tawh tih sawiin, a ward chhunga chengte chiang zawka chhinchhiah an nih theihna tur Know Your Citizen (KYC) hmangin chhinchhiah hna a kalpui tan tih a sawi.
Inrinni khan Aizawl Press Club-ah chanchinbumite kawmin Corporator Rosiamngheta chuan, khawvel ram hmasawn leh changkang apiangin data an ulukin an nei chikim thin a. Mizoramah pawh khua leh tui inchian a tul a, chumi vang chuan KYC hi an ward chhungah kalpui tan an nih thu a sawi.
Rosiamngheta chuan data pawimawhna hi hriain, Ward No. V Commitee chuan ngun taka a ngaihtuah hnuah an ward chhunga hman turin Know your Citizen (KYC) tih software chu siamin hman a remtih hnuah, bul an tan tih a sawi a. Tunah rih chuan a bul tanna ang chauh niin, a software hi a la kimchang lo hle a, hmabak la awm te pawh kawng hrang hrang a la tih hmasawn ngai a la nih thu a sawi.
Software-ah hian Ward chhunga veng hrang hrang mipuite nihphung pawimawh zualpui chu dah luh tum a ni dawn tih sawiin corporator chuan chuan, “Local council-ten tul an tihnaah khua leh tuite mamawhnaah an hmang dawn a, vantlang luhchhuah nuai nuai thei a siam a phalrai tur erawh a ni lo a. He software hian thil pawimawh hrang hrang dah tum a niin pem lehkha issue thlengin leh an pemna thleng a hriat zui theih tur dah tum a ni,” a ti.
“Kan tunlai khawvel dinhmun en hian khawvel hi kan inkalpawhin kan inchiahpiah nasa tawh em em a, immigration chungchangte pawh ngaih pawimawh a hun tawh a, mi tha leh tha lote nen lama kan awm khawm tawh avangin data mumal kan neih a tul tawh vanga hetiang hi buatsaih kan ni,” tiin KYC an buatsaih chhan a sawi.
Zawhna chhangin Corporator Rosiamngheta chuan KYC hi bultan chauh an la nih avangin a senso zat tur chiah an la sawi thei lo a, cheng nuai hnih vel chuan daih turah an ngaih thu a sawi.
Ward No. 5 hian veng pathum Zarkawt, Chanmari leh Electric veng te a huam a ni.