Aizawl: MNF chuan insawi fiah renga hun hman ngai lo turin an inzawrhna ang ngeia hnathawk tawh turin ZPM sorkar an phut tih an sawi.
Thuchhuah an siama MNF chuan July 30, 2025-a ZPM thuchhuaha, PMMSY kaltlanga Mizoramin Rs nuai 1,000 a dawn tawh chungchanga thil awmzia an tar lanah, sorkar chet muan zia leh sangha dil neitute hmakhua an ngaih tawk lohzia an tarlangah a ngaih thu an sawi.
Sorkar laipuiin sangha dil neitute tanpuina tur Rs nuai 1000 chu April, 2025-a rawn pek tawh, Mizoram sorkar inthlahdah vang leh sum enkawltu leh a changtuin a vil hneh loh avanga hun rei tak tangkhang a ni tih an thuchhuah hian a tarlang chiang viau tih sawiin MNF chuan, “Hei vang hian Union Ministry of Fisheries, Animal Husbandry & Dairying, Department of Fisheries Secretary chuan July 22, 2025 khan Mizoram sorkar hnenah lehkha thawnin, PMMSY kaltlanga sanction tawh Rs nuai 1000 hmanna tura hma an lak loh chhan a zawt fiah hial a ni,” an ti.
“Enkawl thiam loh avanga he sum hi tangkhang a ni tih hi kan sorkar hian lo hre nawn leh se. Kan sorkar, kalphung thar zuartu, road map neisaa kaltumte hi rim taka thawk, kuthnathawktute sum tur sorkar laipui rawn pek an hnen thleng tura hna thawk tha lo, sorkar laipuiin hma la thuai tura a rawn nawr ngai an nih avangin, hemi hian sum enkawl thiam lo finance minister leh a puibawmtu kawnghmang hre tawk lo kan nei a ni tih a tilang chiang hle,” tiin, insawi fiah renga hun hman ngai lo turin an inzawrh ang ngeia hnathawk tawh turin ZPM kaihhruai sorkar an phut tih an tar lang bawk.