Assam sorkar chuan Bangladesh atanga dan lova an rama lutte hnawhchhuah hna kalpui mekin, Bangladeshi tam tak an vak darh mek a, keini pawh kan lo fimkhur zual a ngai viau.
Kan hriat theuh angin Bangladesh ram buai avang khan an ram mi tam tak an tlanchhia a, India hmarchhak state hrang hrang rawn pankhawm an tam hle.
Tuna Assam in a hnawhchhuah mekte pawh hi vai kan tih dik takte an ni a, kan zohnahthlak unaute an awm awm pawh a hriat loh. Tin, an tam hle dawn tih a hriat sa reng bawk.
Hmarchhak state te hi Assam nena ramri nei vek kan nih avangin state hrang hrangte chuan lo inbuatsaihna leh inhmakhuana an kalpuina a rei tawh a, kan ram hi kan muang bik leh tlat hian a hriat thin.
Tunah hian Mizoram police te pawh ramri a dan lova lutte ngawrh zawka veng tura tih an ni tawh tih hriat a ni a, a lawmawm viau mai. Police te pawh hian kan ram leh hnam himna an kutah a awm tih hriain khauh hrek hrawk ngam se a tha hle.
Kawng hrang hrang hmangin heng mite hi lo lut thei an ni a, ramri hnaih khua hrang hrangah hian sorkar hian sipai a dah thei lo a nih pawhin veivak turin dah reng thei se la, ILP checking thleng hian khauh se a tha hle.
Hnamdang lo lutte hi kan buaina bul tur an la ni reng a, kan sumdawnna leh kan eizawnna thlenga min chimral hreh lo tute an ni. Chuvang chuan heti lam kawngah hian harchhuak thar lehzual ila, hnam rilru puin kan sorkar, sipaite leh mipuite pawh hi i thangharh mawlh mawlh ang u.