China leh Russia chuan US kaihhruai khawvel ram hrang hrang tangrualte ep nan leh thawh dunna tihthatna atan Sea of Japan-ah an lawng sipaiten nunchan an zir dun tan ta.
Chinese leh Russian sorkarte hi tun hnai kum eng emaw zat kal ta atang khan an inkawmngeih hle a, Moscow-in Ukraine a rûn hnuah khawthlang ramten na taka Russia an hrek avang an eibar chawi kangtu ber chu China a ni mek.
Joint Sea-2025 nunchan zir hi Russian lawngchawlhna khawpui, Vladivostok bulah tanin ni thum chhung a awh dawn tih China-a Ministry of National Defence chuan Pathianni khan a puang.
Ram pahnihte hian ‘tuihnuailawng chhanchhuah, tuihnuailawng beih dun dan, van sang atang leh missile hmanga beihna laka inven dan leh tuipuia indo dan’ nunchan an zir dawn a ni.
Chinese chuan guided-missile destroyer pahnih, Shaoxing leh Urumqi telin lawng pahnih thawh chhuahpuiin Russian lawngte nen an che vel dawn tih ministry chuan a sawi.
Nunchan an zir zawhah hian ‘Pacific tuipuia buaina hnaihna hmunah’ lawng sipaite patrol zui an tum bawk.
China leh Russia hian kum tin sipai nunchan hi eng emaw chen kal ta atang khan an nei dun tawh thin a, Joint Sea nunchan zir tak hi chu kum 2012 atanga an tan kha a ni.
Nikum khan China-a chhim lam tuipui kamah neih a ni.
Kumina Sea of Japan-a an neih mek hi thla hmasaa Japan defence ministry-in report a siamah chuan China-in sipai hmanga Russia nena inkawmngeihna thuk zawk an neih chu himna tiderthawng thei a nih thu an tar lang.
“Nunchan zir hi mahni invenna atana tih a ni a, ram dang va bitumna a awm lo,” tiin Russian Navy Pacific Fleet chuan kar hmasa khan a sawi thung niin US Naval Institute-a online news leh analysis portal chuan a tar lang.
Zirtawpni khan Chinese defence ministry pawhin kumin nunchan zir hian ‘ram pahniha inkungkaihna tha tak awm sa tihngheh’ a tum ber tih a sawi bawk.
China hian Russia-in Ukraine-a indona a kalpui mek demna emaw, a sipai hnuk kir tura tihna emaw a la chhuah miah lo va, US pawh telin Kyiv thawhpui ram dangte chuan Beijing hian Moscow hi indonaah a pui niin an ngai.
European hruaitute chuan China hi thla hmasa khan indo titawp tura nawr tura Russia nawr turin an ngen tawh a, Beijing atang erawh chutiang lam hawia tih tumna a awm lem lo.
China hi tumah tan bik nei lo angah a inchhuah ve reng thung a, khawthlang ramte chu Ukraine hnena ralthuam a pek avanga indona tipunlunah an puh let.