Aizawl: Home Minister K. Sapdanga’n Sairang leh Kawnpui inkar kawng (NH-6) tha lo avanga mipui leh lirthei khalhtute harsatna tawh mek chu pawi a tih thu sawiin, harsatna sutkian a nih thuai theih nan kawng siam that hna ngawrh taka kalpui mek zel a nih thu a sawi.
Inrinni khan Home Minister hian Sairang Sairang leh Kawnpui inkar kawng siamthat hna kalpui mek chu a endik a. Minister hi TBC Lalvenchhunga, Advisor to CM bakah PWD leh police hotuten an tawiawm a. Kawnpui leh Khamrang khawtlang hruaitute, MTOA leh driver association hruaitute nen inbiakna neih niin hmalak zel dan tur rel.
Home minister chuan kawng siam that hna thawktu NHIDCL leh PWD-te hmalakna tichak tura khawtlang hruaitute, tlawmngai pawl, lirthei neitute leh lirthei khalhtute inpekna leh tawiawmnaah lawmthu sawiin, kawng chhia avanga Vairengte leh Sairang inkara tangkhang mekte chu a tawrhpui thu a sawi a. An n ei leh in tur pawh Kolasib DC Office-in an lo ngaihtuah zel tur thu a sawi bawk.