- Dr. C. Lalrampana
Dec. 8, 2023 atang khan ZPM Ministry hian ro a rel tan a. A rorel kum 1-na atangin a khat tawka insawimawi rêng rêngin an la khawsa chho ta zel niin a lang. Mahni an insawimawi zurzut ta ni berin a lang. Hei hi a chhan chu SDRP, chapter 14, point 138 a duanah khan an sawrkar huna tihtur an tiam nasa lutuk a, an tileh tak tak thei si lova, an intiamkamna thuvaûkin a vawlet mek ni berin a ngaih theih. Hei hi tu thiam loh ni lovin anmahni thiam loh liau liau a ni a, tumah an mawhpuh thei lovang.
“Mahni insawimawi kan tan leh dawn ta maw? A nih loh leh, in hnena pek tur emaw, in hnen ata emaw sawimawina lehkha, mi thenkhat tan a ngai angin kan tan a ngai ve dawn maw? Mahni insawi mawi chuan fak a hlawh si lo va, Lalpan a sawi mawi chuan fak a hlawh zawk a ni.” tih a ni a; Lalpa sawimawi ni lova anmahni insawimawi chawp an nih avangin tuma fak an hlawh thei ngang lo ni berin a lang.
CM car thar chungchang sawi a tam hle a, hei pawh hi tuna CM ngei hian 2023 campaign lai khan “”ZPM Chief Minister chu car man to-ah a thu dawn lo” tia a sawi vang niin ZPM thupuangtu Pu K Laltluangkima’n a sawi a. Mahse, tunah kan CM chu car changkang cheng nuai 20-32 vel manah a thu nitin ta si a nih hmel. Hei vang hian CM Car man tozia hi mipuite’n an sawi ta nuai nuai a ni ber mai!
Mizoram CM hlui Pute Ch. Chhunga leh Brig. T. Sailo kha Ambassador car man to loteah an thu thin a, khatih laia an car hman kha Rs16,946 – Rs 4.85 Lakh man a ni a. CM Pu Laldenga khan standard 2000 car a hmang a, khatih laia a man kha Rs 2,12,000/- a ni. CM hlui Pu Hawla leh Pu Zorama khan Maruti Baleno car leh Hyundai Varna car an hmang. Khatih lai khan Baleno hi Rs 6.01 Lakh – Rs 7.55 lakh a ni a; Hyundai Car kha Rs 12.07-17. 58 Lakh niin new model erawh Rs 12.50 Lakh – Rs 19.76 Lakh a ni. Tuna CM Pu Lalduhawma car erawh Rs 32 lakh niah ngai ta ila CM dangte ai chuan Rs 13 lakh velin a to filawr hrim hrim tihna a ni.
A engapawh chu ni se CM dang zawng hi chuan inthlan campaign laiin Car man tova an chuan ve loh tur thu hi insawi rinawm nan an hmang ve lova mipui pawhin an sawi ve luai luai lem lo. Tuna kan CM hi chuan sum inrenchem nan tia huaisen taka car man tova a chuan ve loh turzia sawi siin CM hluite car hman aia to uchuak tak a hmangleh si a, Zoram mipuiin ZPM Party dawt sawi an pholang ta mai zawk niin a lang.
CM car manto sawi mawi nana ZPM thupuangtuin mi ramah chuan mi satliah car, hmeichhe khalh tawka ngaih, naupang football khel tur hruaina tawk a nih thu a sawi leh tun laiah chuan state khat CM chuanna atan chuan car pangngai mai a ni a. Mi ramah chuan mi satliah car ang a ni, hmeichhe khalh tawka ngaih, naupang football khel tur hruaina tawk a ni,” a tih bakah India rama state hausa CM thenkhat nuaih 300 man car an hman theih thu a sawite hi mipui bum nana hman chi a ni lo. Leiba ngah state hian state hausate kan tluk pha ve lo tih hriat a pawimawh hle. Chuvangin, Mizoram CM hian inrenchem (austerity measure) kalpui a duh tak tak a nih chuan India rama car man tlawm petrol heh lo ber Rs 5.64 atanga 7.37 lakh man Maruti Celereo car lei mai se, bulletproof emaw CM tana pek theih security Z+, PSO 3, Pilot personnel mi 15, Escord personnel mi 19 a hautak tia a duh ta lo rau rau a nih chuan a chunga tarlan car man tlawm leh tui heh lo ang khi ama tan leh councillor Ministers zawng zawng tan lei mai se sum inrenchemna tha ber a ni ang.